Þáttaskil við varðveislu íslenskra dýrgripa

Þáttaskil verða í þjóðminjavörslu á Íslandi í sumar þegar varðveislu- og rannsóknasetur Þjóðminjasafns Íslands verður tekið í notkun. Undirritun samnings um setrið fer fram í dag, en í setrinu verða kjöraðstæður til varðveislu þjóðminja og vel búin starfsaðstaða til rannsókna, forvörslu, sýningaundirbúnings og kennslu á fagsviði Þjóðminjasafnsins sem er höfuðsafn á sviði menningarminja.

Í frétt frá ÞÍ segir að húsnæðið, sem er að Tjarnarvöllum í Hafnarfirði, sé 4.270 fermetrar að stærð.

Í húsinu verða öryggisgeymslur fyrir stóran hluta safnkosts Þjóðminjasafns og starfsaðstaða fyrir starfsmenn, sérfræðinga, fræðimenn og nemendur. Fullkomin hita- og rakastýring verður í öryggisgeymslum svo tryggja megi varðveislu viðkvæms safnkosts.

Í húsnæðinu verða einnig rannsóknarstofur, forvörsluverkstæði, aðstaða til sérhæfðrar varðveislu og rannsókna jarðfundinna gripa og aðstaða til undirbúnings sýninga. Hluti safnkostsins verður áfram varðveittur í húsnæði safnsins í Kópavogi, þar sem Ljósmyndasafn Íslands í Þjóðminjasafni verður áfram til húsa.

Einnig verður í varðveislu- og rannsóknasetrinu aðstaða til kennslu en Þjóðminjasafn Íslands er háskólastofnun sem felur í sér mikilvægt hlutverk gagnvart rannsóknaraðilum og námsmönnum.

Hönnuður húsnæðis er ArkÞing en það er í eigu fasteignafélagsins Regins.