Landspítalinn virkjar viðbragðsáætlun vegna bilunar i tækjabúnaði

Bilun hefur orðið í tölvusneiðmyndatæki Landspítala í Fossvogi. Varahluta er beðið og áætlað að viðgerð ljúki í síðasta lagi á mánudag.

Í tilkynningu frá spítalanum segir að vegna þessa ástands hafi viðbragðsáætlun verið virkjuð sem miði að því að tryggja öryggi sjúklinga eftir því sem kostur er. Allir sjúklingar sem þurfa rannsókn í tölvusneiðmyndatæki verða fluttir á Landspítala við Hringbraut.

„Viðbragðsáætlunin er í samstarfi við Slökkvilið höfuðborgarsvæðisins um sjúkraflutninga.

Sjúklingar sem þurfa að leita þjónustu á bráðamóttöku geta af þessum orsökum vænst lengri biðtíma en ella,“ segir í tilkynningunni.