Snorri Steinn markahæstur í fyrsta tapi Nimes

Snorri Steinn Guðjónsson var markahæstur í liði Nimes sem tapaði fyrir Toulouse, 22-27, í frönsku 1. deildinni í handbolta í kvöld.

Snorri skoraði sjö mörk úr 16 skotum í leiknum og dró vagninn í sókninni hjá Nimes. Ásgeir Örn Hallgrímsson skoraði eitt mark.

Þetta var fyrsta tap Nimes á tímabilinu en liðið vann fyrstu tvo leiki sína.

Cesson Rennes, sem frændurnir Guðmundur Hólmar Helgason og Geir Guðmundsson leika með, bíður enn eftir sínum fyrsta sigri.

Cesson Rennes tapaði með sjö marka mun, 35-28, fyrir Montpellier í kvöld.

Guðmundur og Geir fundu sig ekki í sókninni í leiknum og skoruðu tvö mörk úr samtals 10 skotum. Guðmundur skoraði eitt mark úr fjórum skotum og Geir eitt mark úr sex skotum.