Starfsandinn er í molum hjá lögreglunni á Norðvesturlandi

Ólga er innan lögreglunnar á Norðurlandi vestra vegna yfirstjórnar hennar á svæðinu. Starfsandinn er í molum og samskipti stjórnenda lögreglunnar við almenna lögreglumenn eru óásættan­leg. Hafa starfandi lögreglumenn brugðið á það ráð að senda lögreglustjóranum bréf sem hann hefur ekki svarað.

Á fundi félags lögreglumanna á Norðvesturlandi í upphafi mánaðarins var ákveðið að senda bréfið og krefjast úrbóta þar sem starfsandi vegna stjórnunarhátta við embættið væru í ólestri. Bréfið má sjá hér til hliðar.

Var óskað eftir því að lögreglustjórinn, Páll Björnsson, myndi svara bréfinu efnislega og koma með tillögur að úrbótum fyrir 25. október. Ekkert bólaði á svarinu í gær.

Mikil umræða hefur verið um löggæslumál á Norðvesturlandi þar sem fáir eru á vakt enda svæðið stórt og víðfeðmt. Í sumar, þegar bifreið fór í sjóinn á Hvammstanga með þeim afleiðingum að maður drukknaði, tók það lögregluna tvær klukkustundir að koma á staðinn. Nú eru lögreglumenn úr umdæminu á námskeiði í Reykjavík og á meðan er undirmannað á vöktum á svæðinu. Einn lögreglumaður er á Sauðárkróki og annar á vakt á Blönduósi.

Stefán Vagn Stefánsson, yfirlögregluþjónn á Sauðárkróki og formaður bæjarráðs Skagafjarðar, vék af fundi þegar umræða um stjórnun embættisins fór fram. „Ég vék af fundi til þess að menn gætu rætt þetta opinskátt. Ég er yfirlögregluþjónn á svæðinu og því þótti mér réttara að víkja af fundi,“ segir Stefán Vagn.

Undir bréfið sem sent var Páli, skrifuðu þeir Vilhjálmur Stefánsson og Pétur Björnsson sem er formaður lögreglufélagsins á Norðvesturlandi. Pétur vildi ekki tjá sig við Fréttablaðið vegna bréfsins. Hann taldi eðlilegt að ræða það fyrst við lögreglustjórann á svæðinu áður en það yrði rætt í fjölmiðlum.

Ekki náðist í Pál Björnsson lögreglustjóra þar sem hann er í fríi erlendis.

Bréfið í heild sinni:

Félagsfundurinn haldinn þann 6.10.2016 sendir lögerglustjóra eftirfarandi erindi:

„Eins og lögreglustjóra er kunnugt um er starfsandi vegna stjórnunarhátta við embættið í miklum ólestri og því óskum við eftir því að lögreglustjóri bregðist við því sem allra fyrst. Fundurinn hefur áhyggjur af því að félagsmenn séu farnir að leita sér að öðrum störfum. Óskum við eftir tillögum að úrlausnum sem allra fyrst og í síðasta lagi fyrir 25. október næstkomandi,“

kveðja

F.h. félagsfundar

Vilhjálmur Stefánsson, gjaldkeri LNV

Pétur Björnsson, Formaður LNV

Fréttin birtist fyrst í Fréttablaðinu