Laun gjaldkera og stjórnenda hækkað mest í bönkunum

Gjaldkerar, millistjórnendur og stjórnendur eru þeir starfsmenn fjármálafyrirtækja sem mest hafa hækkað í launum síðustu þrjú ár. Þetta kemur fram í nýrri kjarakönnun Samtaka starfsmanna fjármálafyrirtækja sem framkvæmd var í febrúar síðastliðnum. Meðalheildarlaun þeirra sem tóku þátt í könnuninni nema 692 þúsund krónum samkvæmt könnuninni og hafa hækkað um 18 prósent frá síðustu könnun samtakanna sem gerð var í febrúar árið 2013.

Gjaldkerar hafa hækkað um 27 prósent í launum á þremur árum og eru heildarlaun þeirra að meðaltali 434 þúsund krónur á mánuði en voru 342 þúsund krónur í febrúar 2013.

Þá hafa laun millistjórnenda í bankakerfinu hækkað um 26 prósent og eru nú 801 þúsund krónur að meðaltali. Laun stjórnenda bankanna nema að meðaltali 1.226 þúsund krónum á mánuði og hafa hækkað um 21 prósent milli kannanna.

Meðallaun sérfræðinga eru 720 þúsund krónur á mánuði og hafa hækkað um 13 prósent á milli kanna. Talsverður launamunur er þó meðal sérfræðinga fjármálafyrirtækja. Þannig eru sérfræðingar sem starfa í eignastýringu með 852 þúsund króna í laun að meðaltali en sérfræðingar í einstaklingsráðgjöf með að meðaltali 524 þúsund krónur í laun á mánuði.

Hlutfall starfsmanna fyrirtækjanna sem segjast mjög eða frekar ánægðir með laun sín jókst um 4,9 prósentustig milli kannanna og nam 79,6 prósent í könnuninni.

Þá telur SSF áhyggjuefni hve margir starfsmenn séu á fastlaunasamningum. Starfsmenn hafi kvartað undan auknu vinnuálagi í kjölfarið og fjölgun ógreiddra yfirvinnustunda. Í könnuninni töldu 15,5 prósent sig vinna fleiri stundir en þau fá greitt fyrir, en árið 2010 töldu 11,6% svarenda það sama. Alls fá 34,7 prósent svarenda ekki greitt fyrir yfirvinnu miðað við 25,6 prósent árið 2010.

Meðalheildarlaun karla voru 822 þúsund krónur á mánuði en kvenna 609 þúsund krónur á mánuði. Líkt og greint var frá í Fréttablaðinu í gær jókst launamunur kynjanna milli kannana þegar búið var að taka tillit til aldurs, menntunar, starfsaldurs og starfsstéttar. 

Launamunurinn nam 12,9 prósent í könnuninni en var 12,1 prósent í könnuninni árið 2013 og 11,9 prósent árið 2010. Alls svöruðu 2.893 félagsmenn SSF könnunni.

Fréttin birtist fyrst í Fréttablaðinu 21. mars.