Perlan fær nýtt hlutverk vorið 2017

Perlan er eitt helsta kennileiti borgarinnar en um langt skeið hefur verið ákveðin óvissa um hvernig best sé að nýta húsið.

Í dag skrifaði borgarstjórinn í Reykjavík undir samning við við félagið Perlu norðursins um leigu á Perlunni undir stærstu náttúrusýningu landsins þar sem lögð verður áhersla á fræðslu, skemmtun og upplifun. Þar verður meðal annars að finna alvöru íshelli, norðurljósahvel og fuglabjarg svo eitthvað sé nefnt.

Sýningin verður öll hin glæsilegasta en unnið verður með færustu hönnuðum, fræðifólki og tæknimönnum við uppsetningu hennar. Áætlaður kostnaður við uppsetninguna er einn og hálfur milljarður króna en sýningin opnar á vordögum á næsta ári.