Netanyahu segir ályktun Öryggisráðsins svívirðilega

Benjamin Netanyahu, forsætisráðherra Ísraels, segir það svívirðilegt að  Öryggisráð Sameinuðu þjóðanna hafi samþykkt ályktun þar sem kallað er eftir því að Ísraelar stöðvi uppbyggingu frekari landnemabyggða á Vesturbakkanum og austurhluta Jerúsalem.

Öryggisráðið samþykkti ályktunina í gær. Upphaflega var hún lögð fram af Egyptum sem drógu hana til baka eftir afskipti Donald Trump, tilvonandi Bandaríkjaforseta. Í kjölfarið lögðu Malasía, Nýja-Sjáland, Senegal og Venesúela ályktunina fram að nýju.

Búist var við því að Bandaríkin myndu beita neitunarvaldi sínu í ráðinu en fulltrúi þeirra sat hjá við atkvæðagreiðsluna sem kom nokkuð á óvart. Önnur ríki greiddu atkvæði með ályktuninni.

Í frétt á vef BBC er haft eftir Netanyahu að Ísrael muni ekki umbera ályktunina en talsmaður Mahmoud Abbas, forseta Palestínu, sagði að ályktunina væri mikið áfall fyrir stefnu ísraelskra stjórnvalda í málefnum Ísrael og Palestínu.