Funda næst á föstudag

Enn ber mikið í milli í kjaraviðræðum flugumferðarstjóra við Isavia og Samtök atvinnulífsins. Aukast því líkur á að ekki verði bundinn endi á deiluna fyrir úrskurð gerðardóms átjánda næsta mánaðar.

Samningafundi lauk án árangurs á þriðjudag. Ríkissáttasemjari hefur boðað næsta fund á föstudag, sama dag og út rennur frestur sem gefinn var til samninga í lögum sem Alþingi setti á aðgerðir flugumferðarstjóra í byrjun mánaðarins. Á þá að skipa gerðardóm sem úrskurðar í deilunni.

Samkvæmt upplýsingum frá Isavia á það þó ekki að stöðva viðræður um einstaka þætti samnings þó að deilan sé komin á borð gerðardóms.

Sigurður Ólafsson, framkvæmdastjóri mannauðssviðs Isavia, sagði við fréttastofu í gær að þess yrði freistað að ná saman á fundinum á föstudag. „Ég vona bara að við náum samningi, það er betra fyrir alla aðila,“ sagði hann.

Þá segist Sigurjón Jónasson, formaður Félags íslenskra flugumferðarstjóra, hóflega bjartsýnn á að saman náist á fundinum.

„En auðvitað vonumst við til þess að geta lent þessu með einhverjum hætti á föstudag. Annars er það bara gerðardómur,“ segir hann.

Samtök atvinnulífsins og Isavia hafa lagt áherslu á að nýr samningur við flugumferðarstjóra falli að ramma SALEK-samkomulagsins, en flugumferðarstjórar hafa í ljósi manneklu og samanburðar við launa erlendis krafist meiri hækkana.

Fréttin birtist fyrst í Fréttablaðinu 9. júní 2016