Stefán Logi Sívarsson er kominn á Vernd

Stefán Logi Sívarsson er laus úr fangelsi og er kominn á Vernd. Hann dvelur þar nú, meðal annars ásamt hinum landsþekktu fjármálamönnum sem hlutu dóma í Al Thani-málinu.

Stefán Logi, sem hefur fengið ýmsar einkunnir í fjölmiðlum, svo sem hættulegasti glæpamaður Íslands, var á tónlistarhátíðinni Secret Solstice um helgina og vakti það upp ugg í brjóstum margra sem til þekkja.

Nýlega gengu lög í gildi sem stytta verulega afplánun fanga, og það kemur Stefáni Loga til góða sem og öðrum. Hann var dæmdur til sex ára fangelsisvistar í Stokkseyrarmálinu svokallaða sem var fjallað ítarlega um í öllum helstu fjölmiðlum landsins og vakti málið allt verulegan óhug. Væntanlega hefur gæsluvarðhaldsvist komið til frádráttar fangelsisvistinni og síðan tvöfaldast lágmarkstími í rafrænu eftirliti, menn fara því talsvert fyrr úr fangelsi nú en áður var og inn á áfangaheimili.

Sjá ítarlega umfjöllun Vísis um lagabreytinguna.

Vísi hefur borist nokkur fjöldi ábendinga um að Stefán Logi hafi verið á Secret Solstice-hátíðinni og vakti það nokkurn ugg í brjóstum þeirra sem jafnframt höfðu fylgst með fréttaflutningi af Stokkseyrarmálinu. Þeir hinir sömu veltu því fyrir sér hvort það gæti verið að þeir sem eru í haldi á Litla Hrauni geti sótt tónlistarhátíðir af þessu tagi, svo skömmu eftir að dómur féll? En, þessi er sem sagt skýringin. Samkvæmt reglum Verndar hafa vistmenn þar heimild til að fara út klukkan sjö að morgni, þeir þurfa að vera komnir aftur í hús fyrir klukkan sex og farið aftur klukkan sjö út aftur og þurfa að vera komnir aftur í hús klukkan 23:00.

„Þeir hafa heimild til þess, þetta er auðvitað búið utan um það að menn tengi bönd sín við fjölskyldu og börn, og verða svo að vera komnir aftur í hús fyrir klukkan 23.00. Þetta er það skref sem þarf til að taka út í samfélagið aftur,“ sagði Þráinn Farestveit, framkvæmdastjóri Verndar, í samtali við Vísi í apríl.