Enginn vistaður í fangageymslum lögreglunnar síðustu 36 tímana

Enginn hefur verið vistaður í fangageymslum lögreglunnar á höfuðborgarsvæðinu síðastliðinn einn og hálfan sólarhringinn og telst það til tíðinda.

Þetta kemur fram í tilkynningu frá lögreglunni sem barst á ellefta tímanum í kvöld.

Þar kemur einnig fram að þjófnaður á garðhúsgögnum hafi verið tilkynntur til lögreglu þar sem bekkur og tveir stólar voru teknir úr garði í Vesturbergi, líklegast um síðustu helgi.

Þá var hald lagt á ætluð fíkniefni, stera og lyf í húsleit í austurborg Reykjavikur fyrr í dag. Málið er full rannsakað.

Um klukkan 18 var tilkynnt um að erlendur karlmaður væri að bjóða vegfarendum við Spöngina í Grafarvogi fatnað merktum frægum vörumerkjum en á heldur lægra verði en þekkist fyrir slíka vöru. „Maðurinn stakk af er hann fékk spurningar um uppruna fatanna og ók á burt á hvítum smá bíl.“

Um klukkan 21 var tilkynnt um líkamsárás í miðborginni þar sem maður var fluttur á slysadeild með áverka í andliti eftir árásina. Árásaraðilans er leitað.