Aðgerðahópur um rekstur Akureyrar

Bæjarráð Akureyrar hefur ákveðið að stofna sérstakan aðgerðahóp utan um rekstur Akureyrarkaupstaðar. Í hópnum munu oddvitar allra flokka í bæjarstjórn eiga sæti ásamt bæjarstjóra og fjármálastjóra. Markmið með stofnun hópsins er að koma böndum á rekstur sveitarfélagsins til langs tíma.

Aðgerðahópurinn á að vinna að tillögum um að ná jafnvægi í rekstri bæjarins þannig að rekstur Aðalsjóðs verði jákvæður. Gert er ráð fyrir halla á þessu ári upp á um 350 milljónir króna. Einnig var tap á síðasta rekstrarári.

Gert er ráð fyrir að hópurinn fundi einu sinni í viku og skili tillögunum til bæjarráðs fyrir 15. apríl.