Fullkominn sóknarleikur Atla Ævars dugði ekki til

Atli Ævar Ingólfsson, línumaður Sävehof í sænsku úrvalsdeildinni í handbolta, skoraði sex mörk úr sex skotum gegn Malmö á útivelli í kvöld en það dugði því miður ekki til fyrir hans menn.

Malmö vann góðan sigur á sterku liði Sävehof, 32-28, en staðan í hálfleik var 14-15 fyrir gestina sem voru búnir að vinna fimm leiki af sex til þessa í deildinni.

Heimamenn tóku völdin í seinni hálfleik og sigu fram úr, en þeir voru með þetta þriggja til fjögurra marka forskot síðustu tíu mínútur leiksins.

Sävehof er í fjórða sæti deildarinnar með tíu stig eftir fimm sigra og tvö töp en Lugi er á toppnum með tólf stig.