Notendum fjárhagsaðstoðar borgarinnar fækkar

Nærri fjórðungi færri nýttu sér fjárhagsaðstoð Reykjavíkurborgar á fyrsta ársfjórðungi 2016 en á sama tíma árið 2015. Samtals fækkaði þeim sem nýttu sér aðstoðina úr 1924 í 1.469 manns. Í tilkynningu frá borginni sagði að heildarútgjöld Reykjavíkurborgar hafi lækkað um ríflega 20 prósent vegna fækkunarinnar. Hið rétta er að útgjöld borgarinnar vegna fjárhagsaðstoðar lækkuðu sem nemur ofangreindri prósentutölu.

Ilmur Kristjánsdóttir, formaður velferðarráðs Reykjavíkurborgar, segir að árangurinn sé tilkominn vegna átaks borgarinnar. „Það er að skila sér árangur af einstaklingsmiðaðri nálgun. Þetta er tvíþætt, þeim sem leita aðstoðar er vísað fyrr til Vinnumálastofnunar en svo er nú að skila sér árangur í hópi langtíma notenda.“

Samkvæmt skýrslu um fjárhagsaðstoð borgarinnar nýta 15 prósent sér fjárhagsaðstoð til framfærslu í 12 mánuði eða lengur. Í Breiðholti búa hlutfallslega flestar fjölskyldur með fjárhagsaðstoð. Þar á eftir koma hverfi miðborgar og Hlíða.

Athygli vekur að árið 2015 voru meira en 2,5 sinnum fleiri með fjárhagsaðstoð í Breiðholti en í Vesturbæ. Hæsta menntunarstig borgarinnar er í Vesturbæ þar sem 24 prósent eru með grunnskólapróf eða minni menntun. 43 prósent íbúa í Vesturbæ eru með háskólapróf á móti 19 prósentum í Breiðholti.

„Það er átak að koma fólki út á vinnumarkað. Öll úrræðin sem eru í boði, Grettistak og kvenna- og karlasmiðja, og það að hlúa að fólki er að skila sér,“ segir Ilmur.

Bætt atvinnuástand skili sér líka í færri notendum fjárhagsaðstoðar. „Núna erum við að byrja að uppskera árangur af því að það er búið að vera í gangi náin vinna með fólki. Fólk er að skila sér heilla út í atvinnulífið og helst þar. Þannig að við erum að fækka langtímanotendum.“



Greinin birtist fyrst í Fréttablaðinu 7. júní 2016