Skógareldarnir teygja sig í austurátt

Fátt bendir til þess að skógareldarnir í Kanada séu á undanhaldi. Þeir halda enn áfram að breiða úr sér og hafa nú teygt sig í austurátt þar sem þeir loga í Saskatchewan-héraði. Kjöraðstæður eru fyrir skógarelda á þeim slóðum.

Svæðið er að mestu óbyggt en rúmir þrjátíu kílómetrar eru í næsta bæ. Fólk er ekki talið í mikilli hættu en þó er búist við að loftgæði verði slæm í næsta nágrenni. Sem stendur brenna alls níu eldar í héraðinu.

Eldarnir loga nú á rúmlega 4.800 ferkílómetra svæði. Aðstæður eru afar erfiðar og stórhættulegar fyrir þá rúmlega eitt þúsund slökkviliðsmenn sem nú eru að störfum.

Skógareldarnir hafa leikið bæinn FortMcMurrey í Alberta-fylki í Kanada grátt. Yfir áttatíu þúsund íbúum hans hefur verið gert að yfirgefa heimili sín en unnið er að því að gera þeim kleift að snúa aftur.