Fyrrum besta tenniskona heims hætt fyrir þrítugt

Serbneska tenniskonan Ana Ivanovic hefur ákveðið að leggja spaðann á hilluna aðeins 29 ára gömul.

Hún var eitt sinn efst á heimslistanum og vann Opna franska meistaramótið árið 2008.

Hún hefur verið að glíma við meiðsli síðan í ágúst og hefur fallið niður í 63. sætið á heimslistanum.

„Ég hef bara áhuga á að keppa ef ég get staðið undir mínum væntingum. Ég get það ekki lengur þannig að það er kominn tími á að gera eitthvað annað,“ sagði Ivanovic.

Hún var efst á heimslistanum í tólf vikur árið 2008 og vann fimmtán mót á ferlinum.

Ivanovic giftist knattspyrnukappanum Bastian Schweinsteiger, leikmanni Man. Utd, fyrr á árinu og ætlar sér út í viðskipti og tískugeirann. Hún mun einnig halda áfram að vinna fyrir Unicef.