Hvatningaverðlaun Öryrkjabandalagsins veitt í Hörpu í dag

Hvatningaverðlaun Öryrkjabandalags Íslands voru veitt við hátíðlega athöfn í Hörpu í dag á alþjóðadegi fatlaðs fólks. Er þetta í tíunda sinn sem verðlaunin hafa verið afhent og er hönnuður verðlaunagripsins Þórunn Árnadóttir, vöruhönnuður.

Megintilgangur verðlaunanna er að varpa ljósi á þá sem hafa með jákvæðum hætti stuðlað að einu samfélagi fyrir alla og voru verðlaunin veitt í þremur flokkum, flokki einstaklinga, flokki fyrirtækja og stofnanna og flokki umfjöllunar og kynningar.

Ellen Calmon formaður Öryrkjabandalagsins hélt ávarp á verðlaunaafhendingunni og sagði að árið 2016 hefði verið merkilegt í sögu mannréttindabaráttu fatlaðs fólks á Íslandi en þar vísaði hún til fullgildingar á samningi Sameinuðu þjóðanna um réttindi fatlaðs fólks á Alþingi í haust.

Ellen vék einnig að nýföllnum hæstaréttardómi í máli Salbjargar Óskar Atladóttur sem kvað á um að hún fengi ekki að velja að búa alfarið heima hjá sér og sagði að Öryrkjabandalagið harmaði þá niðurstöðu og sagði Ellen að enn væri mikilvæg vinna fyrir höndum.

Hvatningaverðlaunin fengu:



Í flokki einstaklinga fékk Friðrik Sigurðsson, fyrrverandi framkvæmdastjóri Þroskahjálpar, verðlaun fyrir störf sín í þágu fólks með þroskahömlun og aðstandenda þeirra. Hann hefur unnið mikið frumkvöðlastarf í málefnum fatlaðs fólks og verið óþreytandi í hugsjónastarfi sínu fyrir mannréttindum og sýnileika fatlaðs fólks.

Í flokki fyrirtækja/stofnana fékk Dagsól ehf./verslunin Next verðlaun fyrir metnaðarfulla starfsmannastefnu sem meðal annars felur í sér að ráða fólk með skerta starfsgetu. Um 20% starfsmanna fyrirtækisins eru með skerta starfsgetu sem er í samræmi við markmið fyrirtækisins. Aðgengi í verslun Next er til fyrirmyndar.

Í flokki umfjöllunar/kynningar fékk Tabú verðlaunin fyrir fræðslu og markvissa umfjöllun um stöðu fatlaðs fólks í samfélaginu. Tabú er femínísk hreyfing sem beinir sjónum sínum að margþættri mismunun gagnvart fötluðu fólki. Með umfjöllun sinni styður hreyfingin alla til þess að rjúfa þögnina og tala um það sem ekki má.

Við athöfnina voru einnig afhentir styrkir ÖBÍ til þess íþróttafólks sem keppti á Ólympíumóti fatlaðra sem haldið var í Brasilíu í september. Í haust ákvað stjórn ÖBÍ að styrkja ólympíufarana um 1 milljón króna samtals. Hver ólympíufari fékk því 200.000 króna styrk frá ÖBÍ.

Styrki fengu Helgi Sveinsson spjótkastari, Jón Margeir Sverrisson sundmaður, Sonja Sigurðardóttir sundkona, Thelma Björg Björnsdóttir sundkona og Þorsteinn Halldórsson bogfimimaður.

Aðrir sem hlutu tilnefningar:

Í flokki einstaklinga:Hanna Jónsdóttir fyrir frumkvöðlastarf í þágu fatlaðs fólks í Stykkishólmi og Karl Þorsteinsson fyrir sjálfboðastörf í þágu fatlaðs íþróttafólks.

Í flokki fyrirtækja/stofnana: IKEA fyrir hvetjandi starfsumhverfi sem meðal annars felur í sér að ráða fólk með skerta starfsgetur og Útmeð´a, samstarfsverkefni Geðhjálpar og Hjálparsíma Rauða krossins 1717– tilgangur verkefnisins er að vekja athygli á hárri tíðni sjálfsvíga meðal ungs fólks og hvetja til umræðu um geðheilbrigði.

Í flokki umfjöllunar/kynningar: Ferðabæklingar – fésbókarsíða fyrir ítarlega og virka umfjöllun um aðgengismál fatlaðs fólks og Upplifun fyrir alla – styrktarsöfnun fyrir Reykjadal sem haldin var á vegum meistaranema við Viðskiptafræðideild Háskóla Íslands.