FA segir skattlagningu á áfengi komna út úr öllu korti

Áfengisgjöld á Íslandi eru þau langhæstu í Evrópu. Verði nýframlagt fjárlagafrumvarp samþykkt munu þau hækka enn frekar eða um 4,7 prósent. Félag atvinnurekanda veltir því fyrir sér í frétt sem þeir birtu í dag hvort að engin takmörk séu á skattlagningu á áfengi.

Bendir Félag atvinnurekanda á að áfengisgjöld hafi einnig verið hækkuð í fyrra en þá nam hækkunin rúmlega 20 prósentum á. Var það gert til þess að mæta því að virðisaukaskattur á áfengi var lækkaður í 11%.

Sökum þess að áfengisgjöldin eru föst krónutala á hvern lítra áfengis stuðlaði þessi breyting að því að ódýrari áfengistegunda hækkuðu í verði en þær dýrari lækkuðu. Sú hækkun sem lögð er til í fjárlagafrumvarpinu mun áfram ýta undir þessa þróun.

Til að setja hlutina í samhengi má ætla að þriggja lítra „belja“ af léttvíni sem hækkaði um u.þ.b. 300 krónur vegna breytinganna síðastliðið sumar gæti nú hækkað um 200 krónur í viðbót.

Um og yfir 90 prósent af kaupverði fer í ríkissjóð

Í tveimur dæmum sem Félag atvinnurekanda tekur um skattlagningu ríkisins á „ódýrar“ áfengistegundir kemur í ljós að miðað við hækkun gjaldanna tekur ríkið í sinn hlut um og yfir 90 prósent þess verðs sem neytendur borga.

Á vodkaflösku sem í dag í dag kostar 6999 krónur og myndi hækka um rúmlega 200 krónur við hækkun áfengisgjalda myndi ríkið taka í sinn hlut 94 prósent af verði flöskunnar í formi áfengisgjalds, skilagjalds, álagningar ÁTVR og virðisaukaskatts. 

Hitt dæmið er af þriggja lítra „belju“ af léttvíni. Hún kostar í dag 5.499 krónur en mun eftir hækkun áfengisgjaldsins kosta 5.702 krónur. Þá verður svo komið að ríkið tekur í sinn hlut 84,1% af útsöluverðinu.

Áfengisgjöld rúmlega tvöfaldast frá hruni

Ólafur Stephensen, framkvæmdarstjóri Félags atvinnurekanda segir skattlagningu á áfengi hér á landi augljósalega komna út úr öllu korti.

„Skattlagning á áfengi er augljóslega komin út úr öllu korti þegar neytandinn er farinn að greiða um og yfir 90% af verðinu í ríkissjóð,“

Hann veltir því jafnframt fyrir sér hvort að engin takmörk séu á skattlagningu á áfengi.

„Þetta er tíunda hækkun áfengisgjalda frá hruni. Á þeim tíma hafa þau rúmlega tvöfaldast. Eru engin takmörk fyrir því hversu langt stjórnvöld telja sig geta gengið í skattlagningu á einni neysluvöru? Hversu lengi láta neytendur bjóða sér þetta?“