Sigurför lególistamannsins Brynjars Karls heldur áfram

Lególistamaðurinn Brynjar Karl Birgisson heldur áfram að gera það gott en eftirgerð hans af hinu sögufræga Titanic skipi hefur vakið mikla athygli. Tilkynnti hann það á Facebook síðu sinni í dag að Titanic safnið í Branson í Bandaríkjunum hafi leitast eftir því að fá skip hans til sýninga á safninu á næsta ári. 

Eftirgerðin sem gerð er úr 56 þúsund Legókubbum er hin allra glæsilegasta. Skipið tók Brynjar Karl eitt ár í smíði en hulunni var svipt af skipinu við hátíðlega athöfn í Hagkaup í Smáralind í apríl í fyrra.

Brynjar Karl komst fyrst í fréttirnar árið 2014 þá ellefu ára gamall en þá skoraði hann á Legoland að bjóða sér í verksmiðju þeirra í Billund og gefa sér tækifæri til þess að smíða sitt eigið Titanic skip úr legókubbum. Í kjölfar fréttarinnar hófst kubbasöfnun hér á landi svo að Brynjar Karl gæti látið draum sinn rætast. 

Þetta er ekki í fyrsta sinn sem að Brynjari Karli er boðið að sýna skip sitt á erlendri grundu en Vísir greindi frá því í júní í fyrra að honum hefði verið boðin þátttaka á einni stærstu Legósýningu Norðurlanda. Framtíðin er því án efa björt hjá þessum unga skipasmið.