Ellefu ára drengur skorar á LEGOLAND

„Þetta er algjörlega hans hugmynd, í aðeins einfaldari útgáfu,“ segir Bjarney Lúðvíksdóttir, móðir Brynjars Karls, ellefu ára gamals drengs, í samtali við Vísi í kvöld. „Hann var búinn að skrifa bréf sem hann vildi senda en síðan fannst okkur myndband skemmtilegri hugmynd.“

Þau mæðginin birtu í kvöld stutt myndband þar sem Brynjar skorar á LEGOLAND að bjóða honum í verksmiðju þeirra í Billund og gefa honum tækifæri til þess að smíða sitt eigið Titanic skip úr legokubbum. Bjarney myndi fylgja honum út og taka upp ferðalagið sem gæti seinna orðið að heimildamynd um einhverfu.

Brynjar Karl talar merkilega góða ensku í myndbandinu þrátt fyrir ungan aldur og segir Bjarney það vera að mestu internetinu og tölvunotkun hans að þakka. „Síðan er hann með svo skemmtilegan hreim sem að stemmir líklegast frá Harry Potter myndunum,“ segir Bjarney.

Skrifaði bæjarstjóranum bréf

Brynjar er mjög uppátækjasamur strákur en hann skrifaði eitt sinn bæjarstjóra Mosfellsbæjar bréf þar sem hann hvatti bæjaryfirvöld til þess að smíða endurgerð af Titanic skipinu fræga. „Hann vildi að allir gætu fengið að njóta þess að stíga um borð Titanic,“ segir Bjarney um bréfið. „Hann fékk meira að segja svar frá bæjarstjóranum að þetta væri frábær hugmynd en að fjárlög bæjarins leyfðu það ekki.“

Mæðgingin eru vongóð um að LEGO muni sjá myndbandið. „Við erum samt búin að útskýra fyrir Brynjari að það gæti ekki tekist og hann er sáttur við það,“ segir Bjarney „En við vonum bara það besta.“

Myndbandið má sjá hér fyrir neðan.

)