Amma hrærir í blóðsúpu

Óhugguleg hljóð munu heyrast úr bílskúr í Hafnarfirði í kvöld en fjölskylda Þorgerðar Hafsteinsdóttur tekur Hrekkjavökuna alvarlega. Húsið er skreytt hátt og lágt og amman hrærir í eldrauða blóðsúpu.

„Við höfum slegið upp Hrekkja­vökupartýi annað hvert ár. Byrjuðum á því fyrir mörgum árum, löngu áður en hrekkjavakan fór að festa sig að ráði í sessi hér á Íslandi. Systir mín er gift Ameríkana og hann kom með þessa hefð inn í fjölskylduna,“ segir Þorgerður Hafsteinsdóttir, hársnyrtir sem blæs til hrekkjavökuveislu í kvöld með fjölskyldunni.

„Við leggjum mikinn metnað í þetta, heimilið er allt undirlagt og við tökum allavega tvo daga í að skreyta. Yfirleitt búum við til draugahús í bílskúrnum. Krökkunum finnst þetta alveg frábærlega skemmtilegt,“ segir Þorgerður.

„Ég á fjóra stráka, 14, 16, 25 og 28 ára Það er enginn þeirra vaxinn upp úr þessu. Þessi 25 ára tók til dæmis að sér að græja draugahúsið síðast. Það heyrast meira að segja óhugguleg hljóð í draugahúsinu og svo var útbúinn einhver ógeðslegur karl sem lá dauður í baðkarinu. Það hefur ýmislegt verið græjað.“

Þora krakkarnir í hverfinu að banka upp á? „Það var eiginlega ekkert um að krakkar færu milli húsa hér í kring fyrr en í fyrra, en þá vorum við ekki með draugahúsið, við gerum þetta bara annað hvert ár. Við verðum með hrekkjavöku í ár og tókum alla helgina í að undirbúa og skreyta,“ segir Þorgerður.

„Við bjóðum gestum til okkar og hver og ein fjölskylda kemur með eitthvað ógeðslegt á matarborðið. Síðast bauð ég upp á horugan Shrek, úr grænlituðu skyri. Það hafði enginn lyst á því, sem var dálítið fyndið. Yfirleitt er líka blóðsúpa á borðum, sem er bara tómatsúpa. Mamma mín, amman í hópnum sér alltaf um að útbúa súpuna og svo bökum við brauðfingur sem við dýfum í.“