Viðskipti innlent

Ný risa­skip þegar Reykja­vík verður tengi­höfn Græn­lands

Kristján Már Unnarsson skrifar
Meginskipaflutningar Grænlands verða í framtíðinni í gegnum Reykjavík í stað Álaborgar í Danmörku, samkvæmt samstarfssamningi Grænlendinga og Eimskips. Samningarnir fela jafnframt í sér smíði stærstu flutningaskipa í sögu Eimskips. 

Skipasamgöngur Grænlands hafa enn á sér nýlendubrag, eitt skipafélag hefur einokun á flutningunum sem nánast eru allir milli Grænlands og Álaborgar í Danmörku. Grænlensk stjórnvöld, í gegnum skipafélagið, hafa nú ákveðið að tengjast flutningakerfi Eimskips í staðinn; um Reykjavík, Þórshöfn í Færeyjum og Århus, en stefnt er að því að ljúka samningum fyrir áramót á grundvelli viljayfirlýsingar Royal Arctic Line og Eimskips frá því í vor.

Royal Arctic Line er i eigu landsstjórnar Grænlands og hefur einkarétt á flutningum til og frá landinu.Mynd/Royal Arctic Line.
Líta má á samningana sem einskonar efnahagslega sjálfstæðisyfirlýsingu af hálfu Grænlendinga. Jafnframt felast í þeim þau skilaboð að þeir ætli sér að draga úr viðskiptum við Danmörku en beina þeim í auknum mæli í gegnum Ísland. 

„Grænlendingar líta til okkar miklu meira heldur en Dana, Danaveldis, og mér finnst það bara mjög ánægjulegt,“ segir Gylfi Sigfússon, forstjóri Eimskips, í viðtali í fréttum Stöðvar 2. 

Stærsta skrefið er stækkun hafnarinnar í Nuuk en jafnframt hafa Grænlendingar nú sjálfir tekið yfir lykilstöður í stjórn skipafélagsins Royal Arctic Line, sem er alfarið í eigu landsstjórnar Grænlands.

Gylfi Sigfússon, forstjóri Eimskips.Stöð 2/Baldur Hrafnkell Jónsson.
„Þetta er náttúrlega stórkostleg breyting á þeirra högum, bæði hvað varðar innflutning til landsins og útflutning. Þeir hafa þarna möguleika á að kaupa inn vörur og hráefni frá miklu fleiri stöðum en í dag, þar sem allt nánast kemur frá Danmörku. 

Og sama með afurðir þeirra í sölu, sem er aðallega fiskur. Hann leitar núna á nýja markaði og væntanlega betra afurðaverð; að geta farið beint í tengingu við okkur inn á Bandaríkin,“ segir Gylfi. 

Gangi samningarnir eftir verður Eimskip eftir rúm tvö ár komið með stærstu gámaflutningaskip í sögu flotans. Þau verða svo stór að stækka þarf hafnir. Lengja þarf viðlegukant í Sundahöfn í Reykjavík en einnig stækka hafnir í Nuuk og Færeyjum til að taka á móti 180 metra löngum skipum.

Nýju skipin taka 2.150 gámaeiningar, þrefalt meira en stærstu skip Grænlendinga í dag. Þau verða 179 metra löng og 31 metra breið.Grafík/Eimskip.
Þau verða sérstaklega gerð til að sigla samkvæmt hafísstöðlum. Áformað er að smíða þrjú slík skip, fyrir 2.150 gámaeiningar, sem er 50% meira en stærstu skip Eimskips bera í dag og þrefalt meira en stærstu skip Grænlendinga. Miðað er við að Eimskip nýti 2/3 hluta plássins en Royal Arctic Line 1/3 hluta. 

„Ef af þessu verður, sem er bara mjög líklegt, - allar viðræður ganga vel, - þá eru þetta fyrstu skrefin sem við erum að taka í endurnýjun skipanna. Skipin verða kannski ekki fleiri að sinna Íslandi en þau verða stærri,“ segir forstjóri Eimskips.

 


Tengdar fréttir

Grænlendingar byggja upp nýtt flugvallakerfi

Grænlensk stjórnvöld áforma stórfelldar flugvallaframkvæmdir sem gjörbreyta flugsamgöngum við landið og gætu styrkt tengsl Íslands og Grænlands enn frekar.

Verkþekking Íslendinga byggir upp innviði Grænlands

Virkjunarframkvæmdir Ístaks, sem nú standa yfir við Diskóflóa á Grænlandi, skila 6-8 milljarða króna tekjum til íslenskra fyrirtækja. Íslensk verkþekking byggir um leið upp innviði Grænlands og segir orkumálastjóri landsins smíði vatnsaflsstöðva hafa gríðarlega þýðingu. Þetta kom fram í þættinum Ísland í dag á Stöð 2 í kvöld, þeim síðari um störf Íslendinga á Grænlandi, en sá fyrri var í gærkvöldi. Virkjunin við Ilulissat telst kannski ekki stór á íslenskan mælikvarða, hún verður 22,5 megavött eða um fjórðungur af stærð Búðarhálsvirkjunar, sem nú er í smíðum.






Fleiri fréttir

Sjá meira


×