„Sérkennilegast“ að sjá útspil vogunarsjóða
Sigurður Ingi kaus á Flúðum í morgun.
„Þeir hafa verið skemmtilegir og jákvæðir, síðustu dagar. Lokadagarnir í kosningabaráttunni. Ég er bjartsýnn á að árangurinn verði ágætur, þegar talið er upp úr kjörkössunum,“ segir Sigurður Ingi við Vísi.
Sigurður Ingi hefur haft að venju að heimsækja allar kosningaskrifstofur Framsóknarflokksins í kjördæminu og nú bætist höfuðborgarsvæðið við þá hefð. Hann mun því vera mikið á farandfæti í dag. Hann kaus á Flúðum, fer svo á Selfoss og síðan suður með sjó á Reykjanes og endar á höfuðborgarsvæðinu í kvöld.
„Sem er bara tilhlökkun og skemmtilegheit. Ég trúi ekki öðru en að Reykvíkingar vilji halda okkar öfluga utanríkisráðherra áfram í pólitík. Henni Lilju.“
Hann segir kosningabaráttuna hafa verið óvenjulega á margan hátt.
„Hún var náttúrulega á óvenjulegum tíma og hefur vissulega verið stutt. Mér fannst eins og enginn flokkur hefði raunverulega verið tilbúinn í hana fyrr en síðustu tíu til tólf dagana.
En svo var mjög undarlegt að sjá síðustu dagana að erlent auðmagn færi að reyna að blanda sér í kosningabaráttuna með auglýsingum til kjósenda um að koma núverandi ríkisstjórn frá. Vegna þess að við höfðum verið svo vondir við vogunarsjóðina. Það fannst mér og það er mjög óvanalegt.“
Sigurður bendir á að Lee Buchheit, fyrrum ráðgjafi stjórnvalda við afnám gjaldeyrishafta, hafi sagt þetta vera án fordæma á Stöð 2 í gær.
„Mér hefur fundist þetta vera sérkennilegast að sjá.“
Hann segir einnig að baráttan hafi að þessu sinni verið meiri á samfélagsmiðlum en áður.
„Þeir hafa tekið svolítið völdin með mikið af myndböndum. Það er kannski svolítið skemmtilegt, nema þá allir séu búnir að fá nóg af Facebook, Twitter og Instagram eftir þetta.“
Tengdar fréttir

Leið flokkaflakkarans um kosningarvökur
Flestar kosningavökur næturinnar fara fram í miðbænum og eru öllum opnar. Víða er boðið upp á drykki og skemmtiatriði á meðan beðið er eftir tölum. Mikilvægt að fylgjast með gangi mála til að finna út hvar mesta stuðið verður.

„Baráttan stendur yfir til klukkan tíu í kvöld“
Oddný Harðardóttir, formaður Samfylkingarinnar er bjartsýn fyrir kjördag.

Búinn að kjósa og fer að smíða ramp
Þorvaldur Þorvaldsson, formaður Alþýðufylkingarinnar, segir flokkinn halda ótrauðan áfram sama hverjar niðurstöðurnar verða.

„Aldrei verið jafnauðvelt að kjósa“
Benedikt Jóhannesson, formaður Viðreisnar, kaus flokk sinn í fyrsta skipti í morgun.

Bjartsýni slagorð Óttarrs
Formaður Bjartrar framtíðar mætti á kjörstað í ráðhúsi Reykjavíkur í morgun.

Fjölmennt lið fréttamanna mætt þegar Birgitta kaus
Birgitta segir Pírata vera rétta aðilann til að ráðast í þær breytingar á kerfinu sem fólk hefur kallað eftir.

Í beinni: Landsmenn ganga til kosninga
Vísir greinir frá öllu því sem gerist á kjördag um leið og það gerist.

Vonast eftir afgerandi kosningu
Bjarni Benediktsson, formaður Sjálfstæðisflokksins, bíður spenntur eftir að sjá hvernig þingið raðast saman.