Enginn stigið fram þótt fjöldi vitna eigi að hafa orðið vitni að dýraníði

Kolbeinn Tumi Daðason skrifar 5. október 2016 12:06

Lömbin á myndinni tengjast fréttinni ekki. vísir/stefán

Enginn hefur stigið fram vegna misþyrmingar á lambi í Öxnadal í Eyjafirði helgina 17. til 18. september. Matvælastofnun óskaði eftir vitnum í tilkynningu í gær og minnti á að nafnleynd væri í boði ef þess væri krafist.

Mbl greindi frá málinu í gærmorgun þar sem fram kom að mýmörg vitni hefðu orðið að misþyrmingu lambsins við smölun. Einn smalanna hefði tekið örmagna lamb, gengið í skrokk á því og stappað á hálsi þess. Mörgum hefði brugðið.

Sama dag hefði fundist lamað lamb í Þverárrétt og óskaði Ólafur Jónsson, héraðsdýralæknir á Akureyri í norðausturumdæmi, eftir því að slá lambið af og kryfja það svo. Eigandi þess vildi hins vegar ekki afhenda lambið. Grunur leikur á að um sama lamb sé að ræða en það hefur ekki fengist staðfest, meðal annars vegna þess að lambið fékkst ekki afhent.

Ætla að fá botn í málið

Ólafur segir í samtali við Vísi í dag að málið sé í stöðugri skoðun og staðan verði tekin á því í dag eða á morgun. Matvælastofnun hafi borist nafnlausar ábendingar í september um fyrrnefnda atburði og málið verið í skoðun síðan.

„Við höfum leitað til fjölda manna, beðið um greinargerði, óskað eftir myndböndum og vitnum,“ segir Ólafur og greinilegt að málið er tekið afar alvarlega á þeirra borði. Það sýnir tilkynning þeirra og ósk eftir frekari vitnum í gær.

„Við göngum ekkert svona út nema við teljum annað fullreynt. Það sýnir staðfestu okkar í að fá botn í þetta mál.“

Málinu ekki lokið

Dýralæknirinn leggur þó áherslu á að um liðinn atburð sé að ræða, ekki sé grunur um stöðugt dýraníð. Hann vildi hvorki tjá sig um það hvort farið yrði fram á að fá hræ lambsins til rannsóknar eða hvort rætt hefði verið frekar við hinn grunaða nýðing.

Málið er ekki komið á borð lögreglu en Matvælastofnun vinnur að öflun gagna og hvetur vitni til að stíga fram.

„Þessu máli er ekki lokið. Við gefum okkur þann tíma sem til þarf.“