Mannréttindadómstóll Evrópu tekur mál lögmanns sem skrópaði til skoðunar

Mannréttindadómstóll Evrópu hefur óskað eftir gögnum vegna máls Stefáns Karls Kristjánssonar hæstaréttarlögmanns sem gerð var réttarfarssekt í Hæstarétti í fyrra fyrir að hafa misboðið virðingu Héraðsdóms Reykjavíkur. Stefán Karl var fjarverandi í sakamáli í fjórgang og í kjölfarið leystur frá störfum.

Jón Bjarni Kristjánsson, lögmaður Stefáns Karls, fagnar því að dómstóllinn hafi ákveðið að taka málið til greina. Afar sjaldgæft sé að hann taki mál til skoðunar, enda skipti þau mál sem send séu til hans daglega þúsundum.

„Við vorum mjög óánægðir með þessa niðurstöðu og kærðum þetta til mannréttindadómstóls Evrópu. Dómstóllinn hefur nú svarað okkur og óskað eftir gögnum málsins og það kann að vera að hann muni taka til efnislegrar meðferðar þessa kæru Stefáns til dómsins,“ segir Jón Bjarni í samtali við Vísi.

Stefán Karl sendi frá sér yfirlýsingu vegna málsins á sínum tíma þar sem hann hafnaði því að hafa brotið gegn skjólstæðingi sínum eða sýnt dómnum vanvirðu. Honum hafi ekki verið tilkynnt um dagsetningar á fyrirtökum og að þá hafi hann boðað forföll, nema í eitt skipti. Jafnframt fullyrti hann í yfirlýsingunni að þingbók hafi verið breytt eftir á.

Jón Bjarni tekur fram að illa hafi verið staðið að málum. Til að mynda hafi Stefán Karl ekki fengið andmælarétt. Hann vísar til sératkvæðis sem Karl Axelsson hæstaréttardómari lagði fram þess efnis. Þar sagðist Karl sammála því að Stefán Karl hefði brotið gegn starfsskyldum sínum en að hins vegar hefði átt að kalla til dómþings strax í framhaldinu, kynna Stefáni sakarefnið og gefa honum kost á að koma að andmælum við fyrirhugaða ákvörðun um réttarfarssekt.

„Með því að gera honum sekt með þessum hætti var gengið fram hjá öllum málsmeðferðarreglum sem um refsingar eiga að gilda. Hann eigi að fá kost á að taka til varna og svara þeim sjónarmiðum sem dómari hefur uppi,“ segir Jón Bjarni.

Réttarfarssektin hljóðaði upp á 300 þúsund krónur í Héraðsdómi Reykjaness, en Hæstiréttur lækkaði sektina niður í 50 þúsund krónur. Jón Bjarni segir að um sé að ræða algjört grundvallar atriði.

„Það er ástæða fyrir því að dómstóllinn er búinn að kalla eftir gögnum. Það er mjög óalgengt að mannréttindadómstóll Evrópu taki mál til greina og þess vegna geri ég mínum skjólstæðingum alltaf ljóst að á mjög brattan sé að sækja þegar þeir óska eftir því að málið fari lengra,“ segir hann.