Sjö mörk Arnórs Þórs dugðu ekki til

Arnór Þór Gunnarsson var markahæstur í liði Bergischer sem tapaði með tveggja marka mun, 26-24, fyrir Stuttgart á útivelli í þýsku úrvalsdeildinni í handbolta í kvöld. Arnór skoraði sjö mörk úr 11 skotum í leiknum.

Bergischer hefur farið illa af stað á tímabilinu og tapað fyrstu þremur leikjum sínum í deildinni.

Stuttgart var allan tímann með yfirhöndina og Bergischer komst aldrei yfir í leiknum.

Tveimur mörkum munaði á liðunum í hálfleik, 13-11, og sami munur var á þeim þegar lokaflautið gall. Lokatölur 26-24, Stuttgart í vil.

Björgvin Páll Gústavsson varði níu skot í marki Bergischer sem mætir Füchse Berlin í næsta leik sínum.