Nýr miðbær í Garðabæ

Það eru spennandi tímar í Garðabæ. Draumurinn um nýjan miðbæ er að verða að veruleika með nýjum fyrirtækjum og fjölmörgum nýjum íbúum. Það eru því vonbrigði að bæjarfulltrúinn María Grétarsdóttir, oddviti M-listans, ákveði að gera enn eina tilraun til að gera uppbygginguna þar tortryggilega í grein í Fréttablaðinu í gær.

María heldur því fram að Klasi hf., sem hefur séð um uppbygginguna í miðbænum, hafi fengið afhentar lóðir án þess að greiða fyrir þær eða byggingarrétt á þeim. Þessi dæmalausi málflutningur hefur margoft verið hrakinn, en María lætur ekki segjast. Hið rétta er að Klasi keypti á árinu 2006 tvær lóðir á Garðatorgi, annars vegar Garðatorg 1 og hins vegar lóðina þar sem áður var bensínstöð en nú er húsið Garðatorg 4.

Uppkaupsverðið var 1,2 milljarður króna og með þeirri upphæð greiddi Klasi fyrir byggingarrétt á lóðum við Sveinatungu, Kirkjulund og Garðatorg. Við efnahagshrunið 2008 var ákveðið að fresta framkvæmdum og breyta deiliskipulagi miðbæjarins m.a. með því að minnka verulega byggingarmagn á Garðatorgi. Klasi, sem hafði með lóðakaupunum greitt fyrir alls 23.000 fm byggingarrétt á Garðatorgi, átti þá orðið inneign hjá bænum. Garðabær hefur ráðstafað til Klasa byggingarrétti upp í þann mismun, með úthlutun á fimm einbýlishúsalóðum sem er afar hagstæð ráðstöfun fyrir bæinn. Í upphaflegu skipulagi miðbæjar var gert ráð fyrir að þar yrði bílakjallari í eigu Garðabæjar og var haldið í þau áform enda er nægur fjöldi bílastæða forsenda þess að verslun og þjónusta þrífist. Að lokum má nefna að upphaflega var ætlunin að Garðabær byggði nýtt hús á Garðatorgi fyrir starfsemi Hönnunarsafns Íslands. Við endurskoðun skipulagsins var horfið frá því og í staðinn tók Garðabær á leigu hluta af húsinu Garðatorgi 1 fyrir Hönnunarsafnið. Þar er komin skýringin á leigugreiðslum Garðabæjar til Klasa sem María reynir einnig að gera tortryggilegar.

Málflutningur bæjarfulltrúa M-listans veldur vonbrigðum. Það er auðvitað gott og nauðsynlegt að hafa aðhald en aðhaldið verður að vera málefnalegt og til þess fallið að byggja upp en ekki rífa niður. Mín sýn er til framtíðar, ég horfi björtum augum til næstu ára í nýjum og spennandi miðbæ Garðabæjar og ég skynja að það á við um flesta Garðbæinga sem ég hitti á förnum vegi og til mín leita.

Pistillinn birtist fyrst í Fréttablaðinu