Vilja bjarga risavöxnum einhyrningi Páls Óskars fyrir dularfullt verkefni

Rixavaxinn einhyrningur Páls Óskars, gleðigjafa með meiri, vakti gríðarlega athygli í Gleðigöngunni nú um helgina. Til stendur að farga honum á morgun enda þarf að nota vagninn sem hann er byggður utan um í önnur verkefni. Margrét Erla Maack og kollegar hennar eru þó með aðrar hugmyndir og vilja sjá hvort hægt sé að bjarga honum svo nota megi hann í dularfullt verkefni sem er í bígerð.

„Við erum að fara af stað með verkefni sem ég get ekki alveg talað um núna en það snýr að barnamenningu og upplifun barna af list,“ segir Margrét Erla Maack í samtali við Vísi. „Það væri frábært að fá þennan vagn inn í þetta verkefni vegna þess að hann hentar alveg ofboðslega vel í það.“

Einhyrningurinn er festur á vagn og því gæti reynst þrautinni þyngri að taka hann í sundur með góðu móti, auk þess sem að hann er gríðarstór líkt og gestir Gleðigöngunnar urðu vitni að um helgina. Margrét segist hafa rætt við Pál Óskar hvort að það væri gerlegt að taka einhyrninginn af vagninum og svo í minni hluta enda sé vagninn ekki nauðsynlegur fyrir það sem Margrét og kollegar ætla sér að nota einhyrninginn í. Það sé nú í skoðun hjá Páli Óskar og smiðinum sem kom að smíði vagnsins.

Sjá einnig: Einhyrningur Páls Óskars er sá stærsti til þessa: Táknmynd fyrir hinsegin fólk

Takist það er hinsvegar nauðsynlegt að fá geymslupláss undir einhyrninginn enda eitt til tvö ár í að verkefnið sem nýta á einhyrninginn í komist á koppinn.

„Þetta er brjáluð hugmynd og við erum að reyna að leysa þetta strax í dag. Okkur langar að bjarga þessu enda eru þetta menningarverðmæti,“ segir Margrét Erla en ljóst er að mikil vinna fór í að setja saman einhyrninginn sem var flókin smíði. Svo flókin að Páll Óskar neyddist til þess að senda út neyðarkall á laugardagsmorgninum svo klára mætti einhyrninginn í tæka tíð fyrir Gleðigönguna.

Það tókst þó að lokum með góðri hjálp og vonast Margrét nú til þess að hægt sé að framlengja líf einhyrningsins en það verður þó ekki nema takist að finna geymslurými.

„Ef einhver á flugskýli, endilega hafa samband!,“ sagði Margrét Erla að lokum í gamansömum tón.