Fylgjast grannt með þróun mála í Tyrklandi

Íslensk stjórnvöld hafa fylgst grannt með þróun mála í Tyrklandi síðustu daga og segir Lilja Alfreðsdóttir, utanríkisráðherra, í tilkynningu frá utanríkisráðuneytinu stöðu mála vera grafalvarlega. Staðan þar í landi var rædd á fundi fastaráðs Öryggis- og samvinnustofnunar Evrópu í Vín.

„Þróunin hefur verið mjög hröð og ófyrirsjáanleg og hvetur Ísland til stillingar og sátta,“ segir Lilja.

„Það er mikilvægt að tyrknesk stjórnvöld virði mannréttindi í hvívetna. Eitt er að draga þá til ábyrgðar sem skipulögðu og stóðu að valdaránstilrauninni annað er að stunda víðfeðmar hreinsanir af pólitískum toga,“ segir utanríkisráðherra.

Hún segir þá ákvörðun að lýsa yfir neyðarástandi sérstakt áhyggjuefni sem og „hinar mjög svo umfangsmiklu gagnaðgerðir“ eins og fjöldahandtökur og uppsagnir tugþúsunda starfsmanna í skólum, lögreglu, stjórnsýslu og víðar.

Á fundi ÖSE í Vín tók Ísland undir yfirlýsingu Evrópuríkja þar sem stuðningi var lýst við lýðræðislegar stofnanir samfélagsins.

Í tilkynningunni segir að þung áhersla hafi verið lögð á að Tyrkland „hefði í heiðri virðingu fyrir lýðræði, mannréttindum og grundvallarreglum réttarríkisins og að landið stæði við alþjóðlegar skuldbindingar sínar á vettvangi ÖSE“.

Þá var valdaránstilraunin harðlega fordæmd og mannfall harmað. Samstöðu var lýst með tyrknesku þjóðinni. Tyrknesk stjórnvöld voru hvött til að gæta hófs í viðbrögðum sínum, þ.m.t. að virða Evrópusamninginn um verndun mannréttinda og mannfrelsis, sem m.a. leggur bann við dauðarefsingum.