Ágústspá Siggu Kling – Fiskur: Allt í lagi að vera óþekkur!

Elsku ótrúlega fallegi Fiskurinn minn. Ef þú hefur einhverjar áhyggjur af því að þú getir ekki gert það sem þig langar til að gera þá þarft þú að spá í það að vilja það sem þú getur gert. Þetta er oft spurning um hugarfar. Annars ertu bara umkringdur stöðugu tuði og nöldri yfir því að þú eigir að gera þetta svona og hinsegin og það er svo sannarlega hægt að drepast úr tuði!

Lífið er eins og ástarævintýri og maður getur verið misjafnlega skotinn í lífinu, stundum koma dauðir tímar og stundum er maður alveg yfir sig ástfanginn. Þetta er það sem skapar tilveruna.

Þú hefur gaman af húmor og getur verið mjög opinskár en það er enginn sem pirrast yfir því og þú kemst upp með allt því þú ert svo dásamlegur.

Það er allt í lagi að vera svolítið óþekkur stundum, það brýtur bara upp daginn. Og sem betur fer áttu eftir að vera skemmtilega hvatvís stundum sem mun leiða af sér óútreiknanleg ævintýri núna á næstunni og það verður unun að fylgjast með þér!

Þú ert mjög mikið að spá í það að verða heilbrigður og það þarf svo mikinn sjálfsaga til þess en mér persónulega finnst vottur af kæruleysi fara þér enn betur heldur en mikið af vöðvum!

Ekki fara í of mikla megrun og ekki vinna bara út af launum, ekki fara í skólann sem allir segja þér að fara í en þú hefur engan áhuga á að fara í.

Fylgdu fyrstu hugsun því í henni felast skilaboð frá sálinni. Ekki velta hlutunum of mikið fyrir þér, gerðu það sem þú vilt núna og þú munt uppskera hamingjuna.

Lífið er yndislegt,

þín Sigga Kling

Frægir Fiskar: Elísabet Ásberg listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna, Katla Sign og Baby Kling.