Grunnur að bústað í þjóðgarðinum á Þingvöllum falur á 85 milljónir

Grunnur að 159 fermetra sumarhúsi á besta stað við vatnið í Þingvallaþjóðgarði er nú til sölu hjá Fasteignamarkaðnum.

Það eru hjónin Sólveig Lára Magnúsdóttir og Bogi Pálsson, oft kenndur við Toyota, sem eru að selja. Eignin er við Valhallarstíg nyrðri á bakka Þingvallavatns og stendur á þrjú þúsund fermetra leigulóð í eigu ríkisins.

„Gert er ráð fyrir um 80 fermetra verönd vatnsmegin við húsið og frá henni og stofum má njóta einstaks útsýnis yfir Þingvallavatn og fjallahringinn,“ er myndin sem dregin er upp af aðstæðum í sölulýsingu Fasteignamarkaðarins.

Óskað er tilboða en Guðmundur Th. Jónsson fasteignasali segir verðhugmynd fyrir grunninn vera í kringum 85 milljónir. Fram kemur í auglýsingunni að efri hæð hússins verði 134 fermetrar og byggð úr timbri.

„Er gert ráð fyrir forstofu, holi, svefngangi, barnaherbergi, hjónaherbergi og öðru baðherbergi auk stórra stofa og eldhúss. Fyrirliggjandi teikningar gera ráð fyrir að húsið verði klætt að utan með varanlegri og vandaðri klæðningu, svo sem með kopar. Gert er ráð fyrir allt að 5,0 metra lofthæð í hluta efri hæðar hússins,“ er fyrirhugðu húsi nánar lýst.

Sérinngangur er í kjallara þar sem vera á tæknirými og geymsla auk þess sem Fasteignamarkaðurinn segir að mögulegt væri að innrétta hluta kjallarans.

Grunnur sumarhússins stendur á lóðinni þar sem áður stóð sumarhús í eigu athafnakonunnar Sonju Zorilla sem síðar seldi eignina Vigdísi Finnbogadóttur, fyrrverandi forseta Íslands. Ástríður, dóttir Vigdísar, eignaðist húsið í nóvember 2006 og seldi það eftir þrjá daga til hjónanna Aðalsteins Egils Jónassonar og Ásdísar Höllu Bragadóttur, fyrrverandi bæjarstjóra í Garðabæ. Bogi og Sólveig keyptu síðan eignina í mars 2006.

Strangar reglur gilda um stærð húsa innan þjóðgarðsins.

Þó er heimilt að reisa hús á eldri lóðum jafnstór þeim sem fyrir voru. Bogi og Sólveig létu rífa húsakostinn og fengu samþykktar teikningar að nýrri 159 fermetra byggingu. Á meðan á uppsteypu grunnsins og kjallarans stóð í aðdraganda bankahrunsins 2008 vakti athygli að notast var við þyrlur til að koma steypunni á staðinn líkt og átti við um framkvæmdir við nýtt hús Bakka­vararbróðurins Ágústs Guðmundssonar þar rétt hjá. Enginn akvegur er að þessum lóðum.

Ólíkt því sem á við um hús Ágústs Guðmundssonar, sem lokið var við nokkrum árum eftir hrunið, hefur lítið verið aðhafst í húsi Boga og Sólveigar.

Meðal annarra eigenda nærliggjandi húsa á Valhallarstíg nyrðri má nefnda hjónin Birgi Þór Bieltvedt og Eygló Björk Kjartansdóttur, hjónin Eyþór Arnalds og Dagmar Unu Ólafsdóttur, hjónin Þorbjörgu Helgu Vigfúsdóttur og Friðrik Hallbjörn Karlsson og hjónin Vilhjálm Egilsson og Ragnhildi Pálu Ófeigsdóttur.