Táknrænn gripur fyrir gott ár í Íslandssögunni

Boltinn sem notaður var í leik Íslands og Englands í sextán liða úrslitum EM er nú til sýnis í Þjóðminjasafninu. Margrét Hallgrímsdóttir þjóðminjavörður segir að boltinn sé táknrænn gripur fyrir gott ár í Íslandssögunni.

Leikir íslenska landsliðsins í Frakklandi slógu öll áhorfsmet í sjónvarpi og á þriðja tug þúsunda Íslendinga lögðu leið sína til Frakklands á einum eða öðrum tímapunkti til að ná leik með landsliðinu. Eftir að hafa komist í 8-liða úrslit Evrópukeppninnar var Ísland uppfært í 22. sæti á styrklelikalista FIFA en Ísland hefur aldrei í sögunni verið jafn ofarlega á listanum.

Strákarnir í landsliðinu unnu hug og hjörtu þjóðarinnar með frábærri frammmistöðu. Það var ekki síst sigurinn á Englandi í 16-liða úrslitum mótsins sem kyrfilega meitlaði nöfn þeirra allra í spjöld sögunnar. Nú er boltinn sem notaður var í leiknum til sýnis í Þjóðminjasafninu.

Þótt margir boltar komi við sögu í hverjum leik, ekki síst til að hraða leik þegar knötturinn fer út af, er þetta „boltinn“ enda var hann á vellinum þegar flautað var til leiksloka.

Margrét Hallgrímsdóttir þjóðminjavörður segir að Þjóðminjasafnið sé alltaf að leitast við bæta við sögu sagnfræðilegum heimildum sem hafi þýðingu fyrir alla landsmenn.

„Þjóðminjasafnið er safn allra landsmanna það er ekkert því óviðkomandi. Við söfnum heimildum um mannlíf og viðburði í sögunni allt frá landnámi til dagsins í dag. Og þessi bolti tengist því sem er að gerast í samfélaginu núna og ekki spillir það fyrir að hann tengist því sem sameinaði fólk og minnti okkur á samgleðina. Síðan skiptir hann máli sem heimild um lýðheislu og æskulýðsstarf,“ segir Margrét. 

Og við vitum líka, sama hvað gerist, sama hvað gerist í lífum fólks, að 2016 var gott ár fyrir Ísland. 

„Þetta er heimild um það og við viljum taka við boltanum sem táknrænum grip fyrir þetta.“