Bubba Watson kynnir 24 milljóna króna golfflygildi til sögunnar

Einn af litríkari kylfingum golfsins, Bubba Watson, sem situr í fimmta sæti heimslistans, hefur kynnt til sögunnar græju sem hann segir að eigi eftir að umbylta golfinu en þó verður að segjast að það virðist fremur fjarlægur möguleiki.

Engu að síður er hugmyndin stórskemmtileg og draumi líkast, um er að ræða flygildi sem búið er að hengja golfpoka aftan á sem kylfingar eiga að nota til að svífa um völlinn í stað þess að ganga eða aka.

Myndbandið er kostað af sportvöruframleiðandanum Oakley til að fagna því að keppt verður í golfi á Ólympíuleikunum í Ríó í Brasilíu sem hefjast 5. ágúst næstkomandi. Watson er hluti af liði Bandaríkjanna sem tekur keppir í golfi en myndbandi virðist ekki aðeins ætlað að kynna þennan nýja fararkost kylfinga til leiks og fagna golfinu á Ólympíuleikunum heldur einnig til að kynna PRIZM-sólgleraugun frá Oakley.

Í myndbandinu má sjá reyndan flugmann fljúga um Methven-golfvöllinn í Nýja Sjálandi, þar sem þetta flygildi hefur flugleyfi. Flygildið er smíðað af Martin Aircraft og er á tilraunastigi. Það er getur náð allt að 76 kílómetra hraða og náð allt að 914 metra hæð.

Flygildið gengur fyrir hefðbundnu eldsneyti og gefur frá sér jafn mikinn hávaða og mótorhjól, sem er reyndar frekar hátt. Framleiðandinn vill hins vegar meina að tækið sé fremur hljóðlátt vegna stimplalausrar snúningsvélar sem gefur frá sér hávaða upp á 90 desíbel.

Flygildið getur tekið á loft og lent á þröngum svæðum og gæti því hentað fremur vel í hverskyns björgunarstarf en Martin Aircraft vonast til að selja það til slökkviliðsstöðva, lögregluembætta og sjúkraflutningaaðila. Vonast framleiðandinn til að fá flugleyfi í Bandaríkjunum og selja almenningi það á um það bil 200 þúsund dollara, sem nemur um 24 milljónum íslenskra króna miðað við gengi dagsins í dag.