Framkvæmdarstjóri Lemon: „Landsliðsmenn eiga allir inni samlokur hjá okkur“

Eigendur veitingastaðarins Lemon fullyrða að velgengni Íslenska karlalandsliðsins í fótbolta á EM hafi haft það góð áhrif á fyrirtækið að nú hafi áður lokaðar leiðir opnast. Fyrirtækið hefur þegar opnað útibú í París og segja að vegna gífurlegrar umfjöllunar um eina íslenska veitingastaðinn í höfuðborg Frakklands séu nú á borðinu tilboð um að opna staði í öðrum löndum Evrópu og víðar.

Athyglin sé slík að nú hafi kviknað áhugi fyrir því að opna Lemon staði í Þýskalandi, Spáni, Danmörku, Noregi, Bretlandi, Bandaríkjunum og í Tælandi.

„Þetta er allt mis langt á veg komið,“ segir Jón Arnar Guðbrandsson framkvæmdastjóri veitingakeðjunnar. „Það er áhugi fyrir því að opna fleiri staði í París. Svo eru mjög stórir aðilar í Þýskalandi sem vilja opna marga Lemon staði á næstu fimm árum. Svo erum við með aðila í Bangkok, höfuðborg Tælands, sem við erum að klára einkaleyfi samninga við.

Athygli fjölmiðla opnaði ný tækifæri

Lemon keðjan varð hluti af umfjöllun franskra miðla um EM vegna velgengni íslenska landsliðsins. Jón segir að við það hafi opnast aftur fyrir viðskiptaviðræður sem eigendur staðarins höfðu talið að hefðu runnið í sandinn.

„Fyrirspurnir frá til dæmis Noregi og Spáni frá fólki sem við höfðum haft samband við en ekkert heyrt frá komu svo til okkar daginn eftir að Ísland sló út England 16 liða úrslitum. Velgengni strákanna virkaði mjög vel fyrir okkur líka. Það sama á við viðskiptatengsl í Bandaríkjunum. Menn í þessum viðskiptageira duttu inn á Lemon staðinni í París þar sem þeir voru að fara á leikinn og höfðu svo samband. Við vorum komnir á stað en þetta sparkaði boltanum enn lengra.“

Jón Arnar segir að eigendur staðarins hafi reynt hvað þeir gátu til þess að lokka íslensku landsliðsmennina á veitingastaðinn á meðan þeir voru staddir í París. Dagskrá hafi því miður ekki leyft það. Jón er það þakklátur strákunum að hann vill gjarnan launa þeim fyrir greiðann

„Ég held að það sé alveg á hreinu að strákarnir eiga allir inni fríar samlokur hjá okkur!“

Jón segir að næstu Lemon staðir opni líklegast í Þýskalandi eða Bretlandi, þá í Berlín og London. Stefnt er á að opna þar á næsta ári.