Gekk berserksgang í sumarbústað á Suðurlandi

Lögreglan á Suðurlandi var kölluð út aðfaranótt 17. júní þar sem óskað var bráðrar aðstoðar í sumarbústað í uppsveitum Árnsessýslu vegna manns sem gekk þar berserksgang. Í tilkynningu frá lögreglunni kemur fram að maðurinn hafi skemmt húsmuni og verið ógnandi gagnvart öðru fólki í bústaðnum. Lögregla handtók manninn og var hann færður í fangageymslu þar sem hann dvaldi þar til af honum bráði.

Þá var lögreglan tvisvar kölluðu út vegna hjólreiðakappa í WOW Cyclothon sem féllu af hjólum sínum á Suðurlandi. Annar þeirra féll af hjóli sínu skammt austan við Djúpá á Mýrum á föstudag. Hann var fluttur til skoðunar á heilsugæslustöðinni á Höfn þar sem kom í ljós að hann var óbrotinn en með skrámur og fann til eymsla í skrokknu. Hinn hjólreiðamaðurinn handleggsbrotnaði er hann féll af hjóli sínu á Suðurlandsvegi á móts við Ásmundarstaði í Rangárþingi.

Þá varð harður árekstur um hádegi á föstudag á hringveginum við Stafafell í Lóni. Í bifreiðunum voru sjö manns, allt erlendir ferðamenn og slasaðist einn farþegi lítils háttar á höfði. Ökumaður annarar bifreiðarinnar ók af hliðarvegi í veg fyrir hina bifreiðina sem var ekið eftir hringveginum.

Svo kærði kona innbrot og þjófnað í íbúð sína í fjölbýlishúsi á Selfossi. Sagðist hún sakna ýmsra hluta, til dæmis snyrtivara, fatnaðar og peninga. Ekki er vitað hver var að verki en innbrotið átti sér stað á tímabilinu frá hádegi síðastliðins miðvikudags til sama tíma á fimmtudag.

Þá var lögreglan á Suðurlandi til 20 sinnum vegna slysa og umferðaróhappa í umdæminu. Tveir ökumenn voru svo kærðir fyrir akstur undir ávana- og fíkniefnum, einn fyrir ölvunarakstur og 48 fyrir hraðakstur.