Allir nema Davíð og Ástþór boðað komu

Átak, félag fólks með þroskahömlun, mun í dag standa fyrir viðburðinum Frambjóðendur svara, en þar gefst frambjóðendum tækifæri á að kynna sig og ræða við fundargesti.

„Að okkar viti hefur aldrei verið haldinn slíkur fundur þar sem fólk með þroskahömlun sér um framkvæmdina,“ segir Jón Þorsteinn Sigurðsson, starfsmaður Átaks.

Jón segir hugmyndina hafa komið upp á stjórnarfundi félagsins í maí. „Við ræddum það að við yrðum að finna leið til þess að fatlað fólki fengi rödd inn í kosningarnar því hún virðist svo oft gleymast. Úr varð þessi viðburður.“

Að sögn Jóns verður viðburðurinn opinn öllum en lögð verður sérstök áhersla á að fatlað fólk sé í fyrirrúmi. Þáttastjórnendur þáttanna Með okkar augum muni stýra fundinum með aðstoð stjórnarmanna Átaks. „Þetta verða bæði pólitískar spurningar og öðruvísi spurningar. Til dæmis er ein spurningin hvort þau flokki ruslið sitt og önnur hvenær þau vakni á morgnanna,“ segir Jón.

Allir frambjóðendur fyrir utan Davíð Oddsson og Ástþór Magnússon hafa boðað komu sína. „Ég hef sent ítrekunarpóst á þá tvo en þeir hafa ekki boðað komu sína ennþá.“