Jökulhlaup hafið í Múlakvísl

Hugsanlegt er að jökulhlaupið, sem hófst í Múlakvísl í gær, þegar rafleiðni í vatninu fór ört vaxandi og rennslið fór líka að aukast, koðni niður, en vísindamenn fylgjast grannd með framvindu mála.

Þegar vísindamenn mátu stöðuna í gær töldu þeir að hlaupvatn væri farið að renna úr einum katlanna á vatnasvæði Kötlujökuls en að ekki væri hætta á tjóni að svo stöddu. Að sögn Bryndísar Gísladóttur, náttúruvársérfræðings á Veðurstofu Íslands hefur rafleiðnin aftur minnkað í nótt og vatnshæðin líka. Því er ekki mikið í gangi eins og er.

Aðspurð hvort að þetta geti verið forleikurinn að alvöru hlaupi segir Bryndís svo geta verið.

„En eins og er erum við ekki að sjá boð um neitt meira en það er auðvitað vel fylgst með þessu öllu saman. Þetta er í raun bara leysingavatn sem hefur verið að koma úr Kötlujökli, einum kötlunum þar, og þetta er í raun bara venjulegt á þessum árstíma. Svona yfir sumartímann frá júní til september er það þetta sem gerist á þessum slóðum. Þetta er leysingavatn sem hefur safnast upp yfir vetrartímann og er bara að losna frá.“

Bryndís segir vísindamenn Veðurstofunnar ekki hafa sérstakar áhyggjur af hlaupinu eins og staðan er núna.

 

„Það hefur ekki verið neinn órói og það er engin tilkynning búin að berast til okkar um brennisteinslykt eða neitt slíkt.“