Miðar á Englandsleikinn: Fyrstur kemur fyrstur fær þegar miðasala opnar

Aðdáendur íslenska landsliðsins sem eru enn á Íslandi hyggja nú eflaust margir á för til Frakklands til að sjá leik Íslands og Englands í 16 liða úrslitum EM sem fram fer í Nice á mánudaginn næstkomandi.

Ljóst er að ekki munu allir fá miða sem vilja, enda tekur völlurinn „einungis“ um 35 þúsund manns.

Klara Bjartmarz, framkvæmdastjóri KSÍ, segir að margir stuðningsmenn íslenska liðsins séu þegar búnir að tryggja sér miða.

„Þeir keyptu sér svokallaða skilyrta miða. Þeir sem keyptu sér slíka miða eru öruggir með miða og ekkert mál.

Núna einhvern tímann á næstunni – ég veit ekki hvort það verði í kvöld eða hvenær – þá mun opna sala á einhverjum miðum á leik Íslands og Englands á heimasíðu UEFA. Við vitum ekki hvað þeir verða margir en þar gildir fyrstur kemur, fyrstur fær,“ segir Klara.

Hún segir að einhverjir með skilyrta miða hafi þegar haft samband við sig og spurt hvenær þeir geti sótt þá. Hún segir þær upplýsingar þó ekki liggja fyrir að svo stöddu.