Ósátt um uppsagnir Isavia

Guðmundur Jón Friðriksson sagði í viðtali við Fréttablaðið á þriðjudag að hann væri útilokaður frá störfum við flugumferðarstjórn því Isavia svaraði ekki umsóknum hans. Honum var sagt upp fyrir fimm árum eftir að hann kvartaði undan einelti yfirmanns síns. Héraðsdómur dæmdi uppsögnina ólöglega og Guðmundur hefur ítrekað sótt um starf hjá fyrirtækinu síðan án árangurs.

Sjá einnig: Flugumferðarstjóri segist útlægur frá Isavia 

Í bréfi Björns Óla Haukssonar, forstjóra Isavia, sem hann sendi til starfsmanna fyrirtækisins í gær segir að einungis upplifun Guðmundar sé lýst í fjölmiðlum en jafnframt að fyrirtækið kjósi að tjá sig ekki um málið.

Að auki segir: „[Í] þessu máli var búið að leita allra leiða, meðal annars með aðkomu utanaðkomandi sérfræðinga til að ná farsælli niðurstöðu í málið. Við teljum að óhjákvæmilegt hafi verið að slíta ráðningarsambandinu. Fyrir uppsögninni var ærin ástæða að mati stjórnenda sem að því komu og ég var sammála því mati.“

Yfirmaðurinn var vandinn

Guðmundur segir að Björn Óli hafi aldrei veitt honum viðtal jafnvel þótt hann hafi ítrekað sóst eftir því. Jafnframt segir hann að sérfræðingurinn sem hafi verið kallaður til hafi átt að vinna með samskiptavanda í deildinni sem kom til vegna nýs yfirmanns.

„Það átti að vinna með vinnumóralinn almennt,“ segir Guðmundur. „Allir starfsmenn fóru á sérfund og maður átti að láta allt flakka í trúnaði. Sem ég gerði enda hafði yfirmaðurinn reynt að fá mig rekinn í tvö ár og samskiptin eftir því. Það var skýrt að 90 prósent starfsmanna töldu þennan yfirmann vera undirrót vandans.“

Guðmundur segir Björn Óla fara með rangt mál enda þekki hann alls ekki báðar hliðar málsins.

„Það talaði aldrei neinn við mig um stöðu mála fyrir uppsögn né ræddi leiðir til að leysa vandamál – mér var reyndar aldrei tjáð að það væru vandamál.“

Þarf að skapa sátt

Sigurjón Jónasson, formaður Félags íslenskra flugumferðarstjóra, segir ljóst að að það þurfi að ríkja sátt um starfsumhverfi flugumferðarstjóra. Hann vill ekki tjá sig um starfsmannastefnu Isavia.

„Nú er ég ekki að fullyrða að það sé pottur brotinn í starfsmannamálum Isavia, en ef svo er hver væri þá rétti aðilinn til að rannsaka það? Væri það forstjórinn sem er aðili að málinu og hefur þar af leiðandi hagsmuna að gæta í því?“ spyr hann.

Sigurjón bendir á manneklu í flugumferðarstjórn á Íslandi og þörf fyrir þjálfun. „Því væri eðlilegt að skoða þetta mál nánar. Þarna er um að ræða mann sem hefur mikla reynslu af stjórn flugumferðar sem og þjálfun flugumferðarstjóra og starfskraftar hans myndu nýtast vel í þau verkefni sem fram undan eru.“

Isavia ekki staðið undir ábyrgð

Á Íslandi er ekki lagaleg skylda fyrirtækja að ráða starfsmenn aftur jafnvel þótt uppsögn sé dæmd ólögmæt. Slíkt er háð samkomulagi. Elín Björg Jónsdóttir, formaður BSRB, segir að máli Guðmundar hefði mátt ljúka farsællega með því að viðhafa rétt vinnubrögð innan Isavia um leið og málið kom upp.

„Við höfum talið að fyrirtækið eigi að endurskoða ákvörðun sína, sérstaklega í ljósi þess að uppsögnin var dæmd ólögleg. Það hvílir eðlilega mikil ábyrgð á fyrirtæki eins og Isavia, sem er að fullu í ríkiseigu,“ segir Elín og bendir á að Isavia sé eini vinnuveitandi flugumferðarstjóra á Íslandi. „Það er augljóst að stjórnendur Isavia hafa ekki staðið undir sinni miklu ábyrgð í þessu máli.“ 

Fleiri umdeildar uppsagnir



Dómurinn í máli Guðmundar um ólögmæta uppsögn er ekki einsdæmi í stuttri sögu Isavia. Skömmu áður dæmdi Hæstiréttur Isavia til að greiða félagsmanni Félags flugmálastarfsmanna ríkisins (FFR) miskabætur vegna þess hvernig staðið var að uppsögn. Einnig var Isavia dæmt í Hæstarétti í desember árið 2011 til greiðslu bóta vegna ólöglegrar uppsagnar félagsmanns SFR – stéttarfélags í almannaþjónustu.



Ægir Gíslason sem starfaði sem öryggisvörður í flughöfninni hafði samband við Fréttablaðið og sagðist hafa verið sagt upp en voru greiddar bætur til að hann færi ekki í dómsmál. Hann var beðinn um að þegja um bæturnar.

„Ástæða uppsagnar var líka látin heita samskiptaörðugleikar en ég var orðinn 64 ára og sagt upp þegar atvinnuástandið var slæmt. Enda hef ég ekki unnið síðan,“ segir Ægir. „Það er eitthvað mikið að starfsmannastefnunni í fyrirtækinu.“