Handtekinn var með háreisti í útför Sævars

Annar mannanna sem handtekinn var vegna Guðmundarmálsins á þriðjudag hefur ítrekað sagst í samtölum við fólk hafa borið ábyrgð á hvarfi Guðmundar Einarssonar í janúar árið 1974. Maðurinn er óreglumaður sem kom að málinu á upphafsstigum þess. Lögmaður mannsins sagði í samtali við Fréttablaðið að maðurinn hafi neitað öllum ásökunum lögreglu í skýrslutöku á þriðjudag.

Í samtali við Vísi í gær sagði Sigursteinn Másson, sem gerði myndina Aðför að lögum árið 1996, að maðurinn hefði þá greint sér frá því að hann bæri ábyrgð á hvarfi Guðmundar.

„Á sínum tíma komum við þessu á framfæri til þar til bærra aðila en þetta var bara eitt af svo mörgu sem var að koma fram á þeim tíma en eftir því sem tíminn líður sér maður að það hefði verið full ástæða til að rannsaka þetta miklu betur. Þessum manni var líka sleppt úr gæsluvarðhaldi um leið og hann gaf þennan framburð á þessum tíma. Það er í sjálfu sér vitnisburður sem lögreglan hefði fyrir löngu síðan átt að kanna,“ sagði Sigursteinn í samtali við Vísi.

Fréttablaðið hefur fengið staðfest að maðurinn sem um ræðir eigi sér langa sögu um óreglu. Hann var síðast sakfelldur í mars á þessu ári fyrir þjófnað á listaverki í Hallgrímskirkju. Maðurinn dvaldi langdvölum í fangelsi erlendis við slæmar aðstæður á níunda áratugnum og hlaut þá samúð þjóðarinnar.

Við útför Sævars Marínós Ciesielski, sem dæmdur var ábyrgur fyrir dauða Guðmundar, í Dómkirkjunni árið 2011 hafði maðurinn háreisti og læti og truflaði athöfnina. Málkunnugir manninum segja hann hafa verið sakbitinn vegna málsins alla tíð, hvort sem það sé vegna meintrar aðildar eða þess að hann benti á Sævar sem aðila málsins í yfirheyrslu hjá lögreglu árið 1975.  

Morgunblaðið greindi fyrst frá málinu á miðvikudag og greindi frá því að tveir menn hefðu verið handteknir og yfirheyrðir vegna málsins. Þeim var sleppt að lokinni skýrslutöku. Í frétt RÚV í gær kom fram að húsleit hefði ekki verið gerð á heimilinu eins og Morgunblaðið greindi frá á fimmtudag heldur hafi húsleitarheimild þurft til að handtaka manninn sem um ræðir hér að ofan. Fréttablaðið greindi frá því í gær að ábendingin sem unnið væri eftir væri ekki alveg ný af nálinni heldur borist lögreglu á allra síðustu árum. 

Greint var frá nöfnum hinna handteknu í frétt á Vísi í gær.