Vetrarumferð tekur stökk

Umferð á Snæfellsvegi hefur aukist um 26 prósent á árinu miðað við fyrstu mánuði síðasta árs, eða frá janúar og út maí. Sé litið lengra aftur í tímann nemur aukningin um 40 prósentum.

Vegagerðin leiðir að því líkur að aukin vetrarferðamennska erlendra ferðamanna skýri mikla aukningu, að Snæfellsnes sé í heppilegri fjarlægð frá höfuðborginni þar sem langflestir erlendir ferðamenn hefja dvöl sína. Sama á við um hringveginn sunnan Vatnajökuls þar sem mikil aukning mældist í vetur, þar jókst umferð um 83 prósent í mars.

Þegar meðalumferðin 2003-2016 er skoðuð á Snæfellsvegi fyrir fimm fyrstu mánuði hvers árs sést að umferðin vex árlega um fjögur prósent á ári milli 2011 og 2015, en hefur nú vaxið um 26 prósent milli áranna 2015 og 2016 fyrir sama tímabil.