Jóni Hákoni komið á þurrt land

Landhelgisgæslan hefur í dag reynt að koma dragnótabátnum Jóni Hákoni á þurrt land á Ísafirði.

Björgunaraðgerðir hafa staðið yfir síðustu daga en báturinn kom inn til Ísafjarðar í fyrradag. Verið er að losa sjó úr bátnum sem gegnur hægt en örugglega og búist er við að hann verði kominn á þurrt land síðar í kvöld til frekari rannsóknar.

„Þetta hefur gengið bara mjög vel. Við höfum þurft að þétta bátinn meria heldur en við áttum vona á, en náðum ekki að gera það alveg þannig að við höfum verið að dæla frá honum frá því í gærkvöldi,“ segir Jón Arilíus Ingólfsson, rannsóknarstjóri Rannsóknarnefndar samgönguslysa.

Svo virðist sem báturinn sé verr farinn en menn áttu von á, en töluverður leki er að bátnum og breytti það björgunaraðgerðum.

„Þessi staða hefur breytt því að í staðinn fyrir að taka hann í slipp þá sjáum við okkur ekki annað fært en að taka hann beint á land,“ Segir Jón Arilíus.

Enn er ekki ljóst hvað gerðist þegar báturinn fórst úti fyrir Aðalvík í júlí á síðasta ári.

„Þegar við erum búnir að ná honum upp þá tekur við okkar eiginlega rannsókn. Við þurfum að mæla bátinn upp, til að fá rétta mælingu á hann uppá að reikna stöðugleika. Við eigum eftir að skoða og fara yfir til að sjá hvort við finnum einhverja galla sem geta skýrt þetta atvik. Það er einnig með björgunarbúnaðinn og lensibúnaðinn. Þannig að við komumst í þetta allt saman og við eigum ekki von á því að það hafi skemmst þó þetta hafi dregist þennan tíma. Þannig að við eigum vona á því besta að niðurstöður verði góðar,“ segir Jón Arilíus.