Fagnaðarhöld í dag vegna afmælis kosningaréttar kvenna

Fagnaðarhöld verða í dag í tilefni af 101 árs afmæli kosningaréttar kvenna. Síðar í dag afhendir Eygló Harðardóttir, félags- og húsnæðismálaráðherra, styrki úr Jafnréttissjóði Íslands við hátíðlega athöfn í Iðnó. Tæplega hundrað milljónum króna verður úthlutað úr sjóðnum en hann var stofnaður í fyrra í tilefni af eitt hundrað ára afmæli kosningaréttar kvenna.

Þá verður blómsveigur frá Reykvíkingum lagður að leiði baráttukonunnar Bríetar Bjarnhéðinsdóttur klukkan hálfþrjú og þær fjórar konur sem í framboði eru til embætti forseta Íslands flytja erindi á hátíðarfundi Kvennréttindafélags Íslands.

Þá má einnig nefna að Vigdís Finnbogadóttir, fyrrverandi forseti Íslands, leggur í dag um klukkan ellefu fyrsta hornsteininn að byggingu Stofnunar Vigdísar Finnbogadóttur í erlendum tungumálum. Stofnunin mun starfa undir merkjum UNESCO en þetta er fyrsta nýbyggingin sem byggð er á háskólasvæðinu frá árinu 2007.