„Framsókn skuldar þjóðinni að verja hana gegn Sigmundi Davíð“

Kári Stefánsson forstjóri Íslenskrar erfðagreiningar skýtur föstum skotum að Sigmundi Davíð Gunnlaugssyni formanni Framsóknarflokksins í aðsendri grein í Fréttablaðinu í dag. Þar segir hann að Sigmundur Davíð hafi ekki aðeins gert buxurnar í víðfrægu Kastljós-viðtali þar sem hann laug um tengsl sín við aflandsfélagið Wintris heldur hafi hann einnig gert í buxur heillar þjóðar.

Í greininni leggur Kári út af ræðu Sigmundar Davíðs á flokksþingi Framsóknarflokksins um helgina:

„Hann sást ganga í salinn og grípa upp nokkara viðstadda eins og karakter úr bíómyndinni The Invasion of the Bodysnatchers (Innrás líkamshrifsaranna) og faðma þá. Ef viðstaddir hefðu ekki verið mannskepnur heldur af annarri dýrategund er ég hræddur um að þetta athæfi fyrrverandi forsætisráðherra hefði brotið í bága við dýraverndunarlög og talist refsivert.

Síðan sté hann í pontu og sagði ýmislegt skynsamlegt en hélt því líka fram að það hefði ekki verið honum að kenna heldur einhverjum öðrum þegar hann laug fyrir framan myndavélar sænska sjónvarpsins um aðkomu sína að Wintris, aflandsfélaginu fræga. Hann þvoði sem sagt hendur sínar algjörlega af ábyrgð á því sem hann hafði sagt og gaf það beinlínis í skyn að einhver hefði talað í gegnum hann,“ segir Kári í greininni.

Hann segir þetta minna sig á það þegar dóttir hans, þá 2 ára gömul, kúkaði í sig en þegar mamma hennar spurði hvort hún hefði gert í buxurnar svaraði stelpan því til að hún hefði sko ekki gert það heldur stóra systir hennar.

„Þetta er svolítið fyndið og jafnvel sætt út úr munni tveggja ára barns en eitthvað allt annað þegar það heyrist frá fyrrverandi forsætisráðherra lýðveldisins. Það vill meira að segja svo til að upptakan af Sigmundi Davíð, forsætisráðherra Íslands, þar sem hann sat aulalegur fyrir framan myndavélina og tafsaði og laug, barst um allan heim og varð til þess að grínistar í sjónvarpi og útvarpi, frá Íslandi til Ástralíu, hæddust að honum og landi og þjóð. Það má því leiða að því rök að Sigmundur Davíð hafi ekki bara gert í eigin buxur heldur buxurnar heillar þjóðar.“

Kári segir að þetta sé saga sem við verður að búa við þó að það sé ljóst að í henni rísi íslensk menning ekkert sérstaklega hátt. Hitt sé hins vegar ógnvekjandi að mati Kára að Sigmundur Davíð gangi „nú um eins og grenjandi ljón við að reyna að sannfæra framsóknarmenn um að kjósa sig aftur sem formann. Og það lítur út fyrir að honum gæti tekist það.

Það yrði þjóðinni til ævarandi skammar að maðurinn sem heimsbyggðin lítur á sem ljúgandi aula yrði kosinn í forystusveit íslenskra stjórnmála. Það verður að koma í veg fyrir það. Framsókn skuldar þjóðinni að verja hana gegn Sigmundi Davíð. Hann er hennar Frankenstein. Framsóknarflokkurinn hefur unnið með þjóðinni á farsælan hátt í eitt hundrað ár og því ekki við öðru að búast en að hann sjái um þetta. Ef hann gerir það ekki ber okkur skylda til þess að kjósa þennan XBé-vítans flokk út af kortinu.“

Grein Kára má lesa í heild sinni hér.