Sumarið verður árstíð Sturlu

„Sturla Atlas er listamannanafn Sigurbjarts Sturlu Atlasonar en hann er söngvari/rappari úr 101 Reykjavík. Tónlistin fjallar um líf listamannsins og tekur á því hvernig er að vera ungur í hringiðu ástarinnar, skemmtanalífs og listarinnar. Sturla er hluti af 101 Boys sem samanstendur af ungum og óbilandi listamönnum sem holdgera hvað hverfið stendur fyrir,“ segir Jóhann Kristófer Stefánsson, einn af 101-strákunum sem voru að gefa út myndband við lagið Vino á hádegi í gær og munu gefa út mixteip á föstudaginn.

Ásamt Jóhanni og Sigurbjarti eru þeir Logi Pedro Stefánsson og Arnar Ingi Ingason í þessum hópi en þeir gefa út tónlist undir nafninu Sturla Atlas og hafa einnig verið að senda frá sér aðra hluti, svo sem fatnað og fleira, t.d. hugmyndir að endurnýjanlegum vatnsflöskum svo eitthvað sé nefnt. Ljósmyndarinn Kjartan Hreinsson hefur einnig mjög sterka fagurfræðilega nærveru í hópnum í gegnum ljósmyndir, leikstjórn á myndböndum og hönnun.

„Myndbandinu leikstýrðu Jóhann Kristófer Stefánsson og Kjartan Hreinsson. Ágúst Elí Ásgeirsson skaut það og klippti. Við vildum gera alvöru klassískt rappmyndband án þess þó að svíkja þá fagurfræði sem hefur einkennt verkefnið hingað til. Staðsetningar eru algjört aðalatriði en við skutum myndbandið á Eyrarbakka og í kringum Saltkaup í Hafnarfirði,“ svarar Jóhann aðspurður um myndbandið, sem er markað fagurfræði hópsins sem eins og áður segir hefur verið að senda frá sér hönnun meðfram tónlistarferlinum og því kannski hægt að tala um þá sem fjöllistahóp.

„Þar sem plötuútgáfa á Íslandi er svo gott sem útdauð viljum við geta búið eitthvað til sem hægt er að eiga og tengja við tónlistina og fyrir hvað hún stendur. Með útgáfu These days fylgdi fyrsta línan en hún samanstóð af ljósmyndabæklingi, stutt- og síðermabolum ásamt pólóbolum og buffi og var unnin í samstarfi við Sigga Odds. Í tilefni af HönnunarMars héldum við svo sýninguna Sturla Aqua þar sem við tókum hugmyndina um að gefa út vöru sem samsvarar hugmynda- og fagurfræði Sturla Atlas enn lengra. Á sýningunni var að finna kynningarefni fyrir endurnýjanlega vatnsflösku ásamt Sturla Aqua fatnaði. Með útgáfu Season2 mun einnig koma út varningur í takmörkuðu upplagi en hvenær hann mun verða fáanlegur á eftir að koma í ljós.“

Hópurinn gefur út mixteipið Season2 á föstudaginn og mun það verða þriðja plata sveitarinnar.

„Season2 er í rólegri kantinum og algjör sumarplata og sándið á henni er heilt yfir mjög einkennandi fyrir Sturla Atlas. Hún samanstendur af átta nýjum lögum sem eru flestum ókunnug, þó að glöggir aðdáendur kunni að hafa heyrt einhverjar útgáfur sumra laganna á tónleikum. Season2 er „soundtrack“ sumarsins 2016.“