Stjörnufræðivefurinn gjaldþrota: Sólmyrkvaævintýrið skuldarinnar virði

Stjörnufræðivefurinn var úrskurðaður gjaldþrota í Héraðsdómi Reykjaness í lok síðasta mánaðar. Ástæðan er sólmyrkvagleraugu sem vefurinn hafði til sölu vegna sólmyrkvans í mars síðastliðnum.

Sævar Helgi Bragason, eigandi Stjörnufræðivefsins, segir vefinn skulda 450 þúsund krónur í virðisaukaskatt. Hann telur að um misskilning á milli hans og endurskoðanda hans hafi verið að ræða og bindur vonir við að málið muni á endanum hljóta farsælan endi.

„Þetta kemur mér hreinlega bara á óvart því ég var að bíða eftir tækifæri til þess að hreinlega borga þennan 450 þúsund króna reikning. Hann barst mér ekki, sem gæti verið af völdum einhvers konar klúðurs hjá mér og endurskoðanda míns. En ég er hins vegar búinn að hafa samband við hann og biðja hann um að kippa þessu í liðinn,“ segir Sævar í samtali við Vísi.

Ætlaði að borga allt úr eigin vasa en fékk að lokum óvæntan stuðning

Keypt voru rúmlega 70 þúsund sólmyrkvagleraugu fyrir sólmyrkvann í fyrra. Bróðurpartur gleraugnanna var gefinn grunnskólabörnum um land allt en afgangurinn var seldur fyrirtækjum. Að sögn Sævars kostuðu gleraugun fimm milljónir króna og ætlaði hann upphaflega að greiða fyrir þau úr eigin vasa. Hins vegar hafi óvæntur stuðningur borist á lokametrunum.

„Upphaflega ætlaði ég að borga þetta sjálfur því ég hafði svo bullandi trú á þessu verkefni. Sem betur fer kom ekki til þess og fengum einn stuðning, frá Friðriki á Hótel Rangá,  og var svo óskaplega glaður og þakklátur með það. Það var enginn annar tilbúinn til að hjálpa þannig að ég ætlaði bara að gera þetta sjálfur en það kom svo ekki til þess,“ segir Sævar.

Vel þess virði

Sævari segist hafa brugðið þegar í ljós kom að hann skuldaði tæplega hálfa milljón króna. Hins vegar sé ævintýrið sem hann fékk að upplifa í kringum sólmyrkvann skuldarinnar virði.

„Það var vissulega pínu áfall að sjá að maður skuldaði síðan 450 þúsund eftir allt þetta ævintýri. En ég er búinn að heimsækja marga skóla undanfarið ár, allir krakkarnir muna eftir þessu og flest öllum sem ég hitti fannst þetta æðislegt þannig að það er alveg 450 þúsund króna virði.“

Hann vonast til þess að hægt verði að finna lausn á málinu. „Ég vil bara fá tækifæri til þess að borga þetta og ég skal með glöðu geði gera það. Þetta fær farsælan endi eins og allt sem tengist þessu einstaka verkefni.“

Þá segist Sævar hafa fundið fyrir miklum stuðningi frá fólki. „Ég er hrærður yfir viðbrögðum fólks og það er ótrúlega gaman að sjá hvað fólk er tilbúið til að leggja af mörkum og styðja þetta. Ég bið ekki um neitt en ef fólk vill styðja við okkur þá getur það að sjálfsögðu gert það með því að fara inn á stjörnufræði.is. Eins og sakir standa hef ég verið að leggja úr eigin vasa í þennan blessaða vef og halda honum uppi og undanfarin ár hef ég lagt út tvær og hálfa milljón, og nú bætist hálf við. En ég vil alveg einhvern tímann fá þennan pening til baka.“