Chewbacca konan fór á kostum hjá Corden: Fór í bíltúr með með þáttastjórnandanum og J.J. Abrams

Myndbandið af Candace Payne ærast af gleði þegar hún setti upp Chewbacca grímu er orðið langvinsælasta myndband í sögu Facebook sem sýnt var í beinni útsendingu. Í gærmorgun mætti í morgunþáttinn Good Morning America og eins og búast mátti við þá verður hún í öllum stærstu spjallþáttum heims á næstu dögum.

Í gær skellti hún sér einnig í bíltúr með Bretanum James Corden og leikstjóranum J.J. Abrams en sá síðarnefndi leikstýrði nýjustu Star Wars myndinni. Bílferðin var heldur skemmtileg og settu þau öll upp grímuna frægu og grenjuðu úr hlátri saman.

Payne var síðan gestur í þætti Corden, The Late Late Show. „Daginn sem ég deildi myndbandinu sendi ég vinkonu minni sms þar sem stóð, eitt þúsund áhorfendur!! Ég var þá rosalega spennt með viðtökurnar,“ sagði Candace Payne hjá Corden en núna hefur verið horft á myndbandið fræga 140 milljón sinnum.

Fríkaði út

„Áður en ég fór að sofa um kvöldið þennan dag var talan komin í eina milljón. Ég var algjörlega að fríka út. Svo þegar ég vaknaði morguninn eftir var þetta komið yfir tuttugu milljónir.“

Payne er heimavinnandi húsmóðir.

„Ég hafði bara nokkrar mínútur áður en ég varð að sækja krakkana í skólann og vildi sanna fyrir öllum Facebook-vinum mínum að þessi gríma væri mín. Ég vissi alveg að um leið og börnin mín myndu sjá þessa grímu, myndu þau taka hana af mér. En ég keypti grímuna ekki handa þeim, ég elska þau en hún var samt sem áður ekki fyrir þau.“

Í þættinum í gærkvöldi kom fram að Corden hafði fengið skilaboð frá Peter Mayhew sem hefur leikið Chewbacca í öllum Star Wars myndunum.

„Ég myndi vilja hitta þig og fjölskylduna þína og við verðum með sérstaka Star Wars expo sýningu í þínum heimabæ eftir tvær vikur og þið fáið öll fjóra VIP passa. Ég hef einnig skipulagt fund þar sem ég mun taka á móti þér og fjölskyldunni þinni,“ segir í kveðjunni frá Peter.