Verkföll í frönskum kjarnorkuverum

Starfsmenn í frönskum kjarnorkuverum fara í dag í verkföll um allt landið í einn sólarhring og ganga þannig í lið með félögum sínum í olíuhreinsistöðvum vítt og breitt um landið. Ekki er ljóst hvaða áhrif verkföllin í kjarnorkuverunum munu hafa en Frakkar fá 75 prósent af öllu sínu rafmagni frá kjarnorkuverum.

Verkföllin í olíuhreinsistöðvunum eru þegar farin að valda vandræðum og í höfuðborginni París er þegar farið að bera á bensínskorti. Þá hafa starfsmenn í lestarkerfinu einnig farið í verkfall og óttast menn að ástandið muni ekki lagast fyrir evrópumótið í fótbolta sem hefst eftir tvær vikur.