Atvinnuleysi háskólamenntaðra fer vaxandi

Formaður Stúdentaráðs HÍ segir það ógnvekjandi þróun að háskólamenntun skili ekki sama ávinningi og áður. Fjölgun háskólamenntaðs fólks á vinnumarkaði hefur leitt til aukinnar samkeppni um störf þar sem háskólamenntunar er krafist.

Atvinnuleysi meðal háskólamenntaðra fer vaxandi. Þess utan eru horfur á fjölgun starfa við hæfi háskólamenntaðra ekki góðar. Miðgildi tekna þeirra sem eru á milli tvítugs og þrítugs hefur lækkað verulega frá hruni miðað við aðra aldurshópa en samhliða því hefur hlutfall atvinnulausra með háskólamenntun tvöfaldast frá hruni.

Sjá einnig: Þúsaldarbölvunin virðist ríkja á Íslandi.

Fjárhagslegur ábati háskólanáms hér á landi er almennt minni en í öðrum löndum innan OECD en undanfarin ár hefur launamunur þeirra sem hafa háskólamenntun og þeirra sem hafa hana ekki minnkað töluvert.

„Þetta eru auðvitað bara mjög ógnvekjandi fréttir og sérstaklega í ljósi þess að ég er nú sjálfur að fara að útskrifast núna í sumar. Svo ég innilega vona að eitthvað gerist til þess að þessi þróun snúist við,“ segir Aron Ólafsson formaður Stúdentaráðs Háskóla Íslands.

Aron segist mikið verða var við að fólk fái ekki vinnu við hæfi eftir útskrift úr háskóla og að margir kvíði því hreinlega að fara út á vinnumarkaðinn. 

„Já, ég hef orðið var við það. Og einnig líka þegar fólk er að útskrifast úr náminu sínu þá er það að fá kannski vinnu í þeim geira en þá framlínustörf. Það er að fá störf sem að í sjálfu sér þú þarft ekki háskólamenntun til að starfa við. Og þetta eru langoftast láglaunastörf. Ungt fólk í dag er að fá mjög lág laun greidd. Svo þurfa fyrirtæki svolítið að taka ungu fólku opnum örmum og endurverðleggja hvað ungt fólk hefur fram á að færa,“ segir Aron.

Fréttastofa spurði nokkra nemendur við Háskóla Íslands um atvinnuvæntingar þeirra eftir útskrift eins og sjá má í spilaranum hér að ofan.