Frægustu rapperjur sögunnar

Í gegnum tíðina hafa rapparar oft verið í opinberum erjum við aðra rappara og hefur það stundum endað skelfilega. Rapparar eins og Tupac Shakur og Biggie voru báðir skotnir til bana og vakti það heimsathygli á sínum tíma.

Á síðunni Viral Thread er búið að taka saman fimm eftirminnilegar erjur innan rappsenunnar í gegnum tíðina. Hér að neðan má sjá þá samantekt.

1. Eminem vs. The Source

Tímaritið The Source var mjög stórt í rappheiminum á sínum tíma en árið 2002 notaði rapparinn Benzino sín áhrif innan ritsins til að skrifa illa um heitasta rapparann í heiminum á þeim tíma, Eminem. Benzino var einn af ritstjórum The Source en Eminem svaraði skrifunum með laginu, „Nail in the Coffin“ og hefur tímaritið aldrei náð sér eftir það.

2. Jay Z vs Nas

Í heilan áratug stóðu rappararnir Jay Z og Nas í miklum erjum og létu harðar pillar flakka á hvorn annan við hvert tækifæri.

Aðdáendur þeirra skiptust í tvær fylkingar og stóðu þétt við sína menn. Báðir voru þeir uppteknir af hvor öðrum í fjölmiðlum og létu hvorn annan heyra það.

3. 50 Cent vs Game

50 Cent og Game voru einu sinni góðir vinir og unnu mikið saman. Aftur á móti slettist upp á vinskapinn þegar The Game sagði á plötunni The Documentary að hann myndi ekki taka þátt erjum með G-Unit gegn öðrum röppurum. 50 Cent brást ekki vel við og úthúðaði The Game opinberlega eftir orð hans.

4. Ice Cube vs NWA

Sveitin NWA og Ice Cube lentu í miklum útistöðum þegar sá síðarnefndi gekk úr bandinu þegar hann var ósáttur við þær greiðslur sem hann fékk fyrir að vera einn af aðal höfundum flest allra laga rappsveitarinnar frægu. NWA og Ice Cube létu því allt flakka í fjölmiðlum og fóru ófögur orð á milli þeirra.

5. Tupac vs Biggie

Frægasta rapparaerja sögunnar er án efa milli Tupac Shakur og the Notorious BIG, eða Biggie. Biggie fór fyrir röppurum frá New York og austurströnd Bandaríkjanna. Tupac var aftur á móti ný rödd vesturstrandarinnar, þrátt fyrir að vera sjálfur frá austurströndinni.

Erjurnar hófust fyrst þegar Biggie gaf út lagið „Who Shot Ya?“ og tók Tupac því mjög illa þar sem hann hafði orðið fyrir skotárás. Hann var viss um að Biggie hefði gefið út lagið til höfuðs honum og allt varð vitlaust. Biggie og Puff Daddy sögðu alltaf að lagið hafi verið tekið upp langt áður en umrædd skotárás átti sér stað en Tupac tók ekki vel í þau orð. Stuttu síðar voru þeir báðir myrtir í tveimur mismunandi skotárásum á aðeins sex mánaða tímabili.