Maíspá Siggu Kling – Tvíburi: Vertu svolítið djarfur í ástinni

Elsku smekklegi Tvíburinn minn. Þú ert að fara inn í algjört svona diskó friskó tímabil núna. Þú elskar sumarið og sumarið elskar þig svo sannarlega líka!

Þú ert að setja þig í gírinn núna og þú verður svo ofboðslega orðheppinn eitthvað og góður í að tala fólk til og þú fyllist hamingju þegar þú ert að leysa hlutina í kringum þig.

Þetta er eins og með okkur hin sem erum ekki tvíburar, við erum svo glöð þegar að það kemur helgi og við getum slakað á alveg fram á mánudag. Þín helgi er rétt ókomin og það er allt sumarið. Ég er ekki að segja að þú eigir að slaka á alveg allan tímann en þetta verður skemmtilegasta sumar sem þú hefur átt allavega síðustu tvö til þrjú ár.

Það er mjög mikilvægt fyrir þig að hafa mikla birtu í kringum þig. Hentu gluggatjöldunum eða dragðu allavega vel frá, því að sólin og birtan munu hafa svo góð áhrif á þig. Þú klárar málin, tekur ákvarðanir, lendir á fjórum fótum eins og kötturinn þótt hann detti fram af þriðju hæð, og hláturinn ómar allt í kringum þig.

Steinhættu að setja eitthvað annað fólk á háan stall í kringum þig. Við erum öll jöfn og þú hefur mikil áhrif á fólkið í kringum þig, sérstaklega þar sem þú ert svo skemmtilegur og hefur svo mikla útgeislun.

Og þó að þér finnist eins og þú hafir gert einhver mistök þá er öllum í kringum þig skítsama og eru löngu búnir að gleyma því. Mistök gera þig að merkilegri manneskju og að vera fullkominn er svo fjári leiðinlegt!

Þú þarft að sleppa þér í ástinni og vera svolítið djarfur, hvort sem það er við þinn ektamaka eða bara eitthvert fling. Það er nefnilega eitthvað svo mikil spenna í kringum þig og það þarf að losa hana. Svona er þetta, því lífið er svo gott! Mundu það elskan mín.

Knús og kossar, þín Sigga Kling

Frægir tvíburar: Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland.